Россия Алоқа ва ахборот технологияларини назорат қилиш органи (Роскомнадзор) мамлакатда WhatsApp’га киришни босқичма-босқич чеклашни бошлаганини эълон қилди. Ташкилот маълумотига кўра, ушбу мессенжер террорчилик ҳужумларини мувофиқлаштириш, жиноятчиларни ёллаш, фирибгарлик ва россиялик фуқароларга қарши бошқа жиноятлар учун қўлланилмоқда.
Регулятор таъкидлашича, чеклов чораларини босқичма-босқич жорий этиш орқали фойдаланувчиларга муқобил хизматларга ўтиш имконияти тақдим этилади. Агар WhatsApp Россия қонунчилиги талабларини бажармаса, унинг фаолияти бутунлай тўхтатилиши мумкин.
WhatsApp’да хабар жўнатишдаги муаммолар ҳақида шикоятлар ноябр охирида пайдо бўлган эди. Жорий йилнинг ёзида Роскомнадзор WhatsApp ва Telegram’да овозли қўнғироқларни чеклаш чораларини кўрганди.
Ташкилотнинг тушунтиришича, жиноятчилар ушбу мессенжерлар орқали фирибгарлик қўнғироқлари амалга ошириш ва россияликларни ёллашга уриниш ҳолатларини кўпайтирган. Шунингдек, Россия Рақамли ривожланиш вазирлиги хорижий мессенжерларда овозли қўнғироқларни чеклаш фирибгарлик қўнғироқлари сонини камайтириш ва алоқа хавфсизлигини оширишга хизмат қилишини билдирган эди.
Чекловларга қарамай, WhatsApp Россияда энг машҳур мессенжер бўлиб қолмоқда. 2025 йилнинг август ойида унинг ойлик аудиторияси 97 миллион, кунлик фойдаланувчилари эса 82,1 миллионни ташкил қилган.
Меҳмон гуруҳидаги фойдаланувчилар ушбу мақолага изоҳ қолдира олмайди.
