Rossiya Aloqa va axborot texnologiyalarini nazorat qilish organi (Roskomnadzor) mamlakatda WhatsApp’ga kirishni bosqichma-bosqich cheklashni boshlaganini e’lon qildi. Tashkilot ma’lumotiga ko‘ra, ushbu messenjer terrorchilik hujumlarini muvofiqlashtirish, jinoyatchilarni yollash, firibgarlik va rossiyalik fuqarolarga qarshi boshqa jinoyatlar uchun qo‘llanilmoqda.
Regulyator ta’kidlashicha, cheklov choralarini bosqichma-bosqich joriy etish orqali foydalanuvchilarga muqobil xizmatlarga o‘tish imkoniyati taqdim etiladi. Agar WhatsApp Rossiya qonunchiligi talablarini bajarmasa, uning faoliyati butunlay to‘xtatilishi mumkin.
WhatsApp’da xabar jo‘natishdagi muammolar haqida shikoyatlar noyabr oxirida paydo bo‘lgan edi. Joriy yilning yozida Roskomnadzor WhatsApp va Telegram’da ovozli qo‘ng‘iroqlarni cheklash choralarini ko‘rgandi.
Tashkilotning tushuntirishicha, jinoyatchilar ushbu messenjerlar orqali firibgarlik qo‘ng‘iroqlari amalga oshirish va rossiyaliklarni yollashga urinish holatlarini ko‘paytirgan. Shuningdek, Rossiya Raqamli rivojlanish vazirligi xorijiy messenjerlarda ovozli qo‘ng‘iroqlarni cheklash firibgarlik qo‘ng‘iroqlari sonini kamaytirish va aloqa xavfsizligini oshirishga xizmat qilishini bildirgan edi.
Cheklovlarga qaramay, WhatsApp Rossiyada eng mashhur messenjer bo‘lib qolmoqda. 2025 yilning avgust oyida uning oylik auditoriyasi 97 million, kunlik foydalanuvchilari esa 82,1 millionni tashkil qilgan.
Mehmon guruhidagi foydalanuvchilar ushbu nashrga izoh qoldira olmaydi.
