Қайноқ сувни раковинага тўкиш зарарлими? Мутахассислардан муҳим тавсиялар

Картошка, тухум ёки макарон маҳсулотларини пишириб бўлгач, кўпчилик одамлар қолган қайноқ сувни раковинага тўкиб юборади. Биз бу ҳаракатимиз билан қувурларни ифлосликлардан тозалашга ёрдам берамиз деб ўйлаймиз. Бироқ, ҳақиқатда вазият умуман бошқача экани маълум бўлди.

Муаммонинг асл сабаби шундаки, замонавий уй-жойларда канализация тизимлари асосан пластик полимер материаллардан тайёрланади. Масалан, уйимиздаги сифонлар ва қувурларнинг кўпи поливинилхлорид (ПВХ) дан ясалган бўлиб, ушбу материалнинг максимал чидамлилик ҳарорати 65°C атрофида. Бу ҳароратдан юқори бўлган сувлар материални юмшатиб юборади ва деформацияни келтириб чиқаради. Айниқса, сув ҳарорати кескин ўзгарса, резинали улагич қисмлари герметикликни йўқотиб, оқиб кетиши мумкин.

Бундан ташқари, қувур ва сифонларни тайёрлашда полипропилен ҳам кўп ишлатилади. Бу материал эса 80°C гача бўлган иссиқликка чидамли. Албатта, ПВХ ва полипропилен қисқа вақт ичида 95°C гача бўлган юқори ҳароратга дош бериши мумкин, аммо бу ҳолат мунтазам равишда такрорланса, жиддий зарарларга олиб келади. Айниқса, қувурлар диаметри кичик бўлса (40–50 мм атрофида) ва уларда озиқ-овқат қолдиқлари йиғилиб қолган бўлса, уларнинг қисман торайиши юқори ҳарорат таъсирида деформацияни кучайтириб юборади.

Мутахассислар айтишича, қайнаган сувни тўғридан-тўғри раковинага тўкиш ўрнига уни камида 10 дақиқа совутиш ёки сувни совуқ сув билан аралаштириб тўкиш тавсия этилади. Бу усул қувурларнинг муддатидан аввал ишдан чиқишидан ҳимоя қилади.

Канализация тизимида катта ҳажмдаги қайнаган сувни тезлик билан тўксангиз, қувурдаги резинали улагичлар иссиқлик таъсирида кенгайиб, ўзининг сиқиб туриш хусусиятини йўқотади. Натижада, қувурлардаги сув сизиб чиқиб, ошхона мебельларига жиддий зарар етказиши ёки пастки қаватдаги қўшниларни сув босиб қолиши мумкин.

Канализация тизимидаги ифлосликларни фақат иссиқ сув билан тозалаш деярли имконсиз. Бунинг учун махсус кимёвий тозалаш воситалари талаб этилади. Акс ҳолда, юқори ҳарорат билан тозалаш уринишлари фақат қувурларга зарар етказиши мумкин.

Мутахассислар қувурларда ифлосланишнинг олдини олиш учун қуйидаги оддий тавсияларга амал қилишни маслаҳат беришади:
- Овқат ва ёғ қолдиқларини ҳеч қачон раковинага ташламанг;
- Соч ва бошқа чиқиндиларнинг канализацияга тушишига йўл қўйманг;

Қурилиш чиқиндилари ва нам салфеткаларни ҳожатхонага ташламанг.

Ваннадаги раковина ва ҳожатхонага иссиқ сув тўкиш зарарлими?

Ҳожатхона ва ваннада ишлатиладиган сантехника буюмлари асосан фаянс, чинни, керамогранит ёки зангламайдиган пўлатдан тайёрланади. Ушбу материаллар юқори ҳароратга нисбатан анча чидамли ҳисобланади. Лекин мутахассислар уларга ҳам мунтазам равишда қайноқ сув тўкишни тавсия қилмайди, чунки керамик маҳсулотлар кескин ҳарорат ўзгаришига сезгир бўлиб, уларда кўринмайдиган кичик ёриқлар пайдо бўлиши мумкин.

Хулоса қилиб айтганда, ҳар қандай канализация ва сантехника тизимини узоқ муддат ишлатиш учун юқорида келтирилган оддий, бироқ муҳим тавсияларга амал қилиш мақсадга мувофиқдир. Бу орқали сиз уйингиздаги жиҳозларнинг муддатидан олдин бузилиб қолиши ва қўшимча харажатлардан қочишингиз мумкин бўлади. «Замин»ни Telegram’да ўқинг!