Өзбекстанда жарты жылда 50-ге жуық студент есірткі саудасында ұсталды

Өзбекстанда жарты жылда 50-ге жуық студент есірткі саудасында ұсталды, деп хабарлады Uznews.

Президент жанындағы Есірткі заттарды бақылау ұлттық орталығының мәліметінше, 2025 жылдың алғашқы алты айында 46 студенттің есірткі саудасына қатысы бары анықталған. Бұл туралы орталықтың аға инспекторы Мұхаммадқодир Махмудов хабарлады.

Оның айтуынша, соңғы уақытта қылмыстық топтар студенттерді есірткі тасымалдаушы ретінде белсенді түрде тартуда. Жоғары оқу орындарына түскен жастардың заңсыз әрекеттерге тартылып жатқаны байқалуда.

Сондай-ақ, инспектор елде жасырын нарколабораториялар саны артып келе жатқанын атап өтті. Егер 2024 жылы 5 осындай лаборатория анықталса, 2025 жылдың жарты жылында-ақ 8 жағдай тіркелген.

Махмудовтың айтуынша, енді есірткілер табиғи өнімдерде ғана емес, сонымен қатар сусындарда, энергетиктерде, кофе мен тәттілер сияқты өнімдерде де кездесуде. Бұл заттарды тек бір рет қолдану да күшті тәуелділікке әкелуі мүмкін.

Инспектордің айтуынша, жаңа түрдегі есірткілер адамның өзгерісін бірден байқатпайды. Сондықтан көптеген ата-аналар баласындағы өзгерісті жақсы жаққа деп ойлайды, шын мәнінде бұл дерттің алғашқы белгілері болады. Уақыт өте келе ауырсыну, психикалық күйзеліс және тіпті суицид жағдайлары да кездесіп жатқаны айтылды.

2025 жылы есірткі қылмыстарының саны 2024 жылмен салыстырғанда 23 пайызға артқан. Мұхаммадқодир Махмудов азаматтарды, әсіресе ата-аналарды, балаларына мұқият және сақ болуға шақырды.