NASA Blue Origin компаниясының New Glenn зымыранының апатын зерттеп жатыр

NASA басшысы Джаред Айзекман Канаверал мүйісіндегі Blue Origin полигонында болған апатқа қатысты пікір білдіріп, агенттік бұл аномалия бойынша мұқият тексеру жүргізетінін және жарылыстың болашақ миссияларға әсерін бағалайтынын мәлімдеді. NASA Канаверал мүйісіндегі 36-ұшу кешенінде Blue Origin компаниясының New Glenn зымыранымен болған оқиғадан хабардар. Бұл туралы Ixbt.com хабарлайды .

"Ғарыштық ұшулар — қатал сала, ал ауыр зымыран тасығыштардың жаңа мүмкіндіктерін әзірлеу өте күрделі міндет. Біз бұл аномалияны мұқият зерттеп, оның жақын болашақтағы миссияларға әсерін бағалау және ұшуларды қайта бастау үшін серіктестерімізбен бірге жұмыс істейміз", — делінген агенттік мәлімдемесінде.

Естеріңізге сала кетейік, Blue Origin компаниясының ауыр санаттағы New Glenn зымыранының бірінші сатысын статикалық отпен сынау кезінде қуатты жарылыс болған еді. Amazon Kuiper жерсерігін ұшыруға арналған NG-4 миссиясының зымыраны толығымен жойылды.

Джефф Безос негізін қалаған компания NASA-ның "Артемида" бағдарламасы мен болашақ ай базасы жобасындағы жетекші коммерциялық серіктестердің бірі болып табылады. Бұл жарылыс Gateway ай айналасындағы станциясы үшін жүктер мен модульдерді жеткізу, сондай-ақ Айға қону кестелерінің өзгеруіне алып келуі мүмкін.