Жаңа жыл мерекелері қарсаңында Өзбекстанға келетін қытайлық туристер саны күрт артты. Мамандардың айтуынша, биылғы жылдың басынан бастап Қытай азаматтары үшін визасыз режимнің енгізілуі туристік ағымның екі есеге өсуіне негізгі себеп болды.
Туризм комитетінің Синьхуа ақпарат агенттігіне сілтеме жасап хабарлауынша, 1–3 қаңтар күндері Қытайдан Өзбекстанға әуе билеттерін брондау көрсеткіші өткен жылдың осы кезеңімен салыстырғанда екі есе артқан.
Сарапшылар бұл оң үрдісті визасыз саяхат мүмкіндігімен байланыстыруда. Жаңа тәртіп саяхат үдерісін едәуір жеңілдетіп, қысқа мерзімді демалыс пен мәдени сапарлар үшін бюрократиялық кедергілерді азайтты.
Сонымен қатар, Қытайда жуырда аяқталған «Өзбекстан – туризм жылы» аясында елдің бай мәдени мұрасы мен туристік әлеуетінің кеңінен насихатталуы да қызығушылықтың артуына ықпал етті. Бұған қоса, екі елдің ірі қалалары арасындағы тікелей әуе рейстерінің көбеюі саяхатшылар үшін қолайлы жағдай жасады.
Мәліметтерге сәйкес, қытайлық туристер негізінен Самарқанд, Бұхара және Хиуа секілді тарихи қалаларды қамтитын дәстүрлі туристік бағыттарға басымдық беруде. Бұл Өзбекстанның әлемдік туризм картасындағы беделінің артып келе жатқанын көрсетеді.
