Алишер Никимбаев билан катта интервью (1-қисм)

Таниқли халқаро футбол мутахассиси, Катар Футбол Ассоциациянинг катта техник эксперти Алишер Никимбаев билан катта интервью ташкил қилдик. Суҳбат жараёнида Никимбаев ЎзПФЛ ва умуман ўзбек футболидаги муаммолар, Катанецнинг мураббийлик фаолияти ҳамда Ҳусановнинг "Сити"га ўтиши ҳақида ўз фикрлари билан ўртоқлашди.

- Ассалому алайкум, Алишер ака. Авваламбор, карьерангиз қандай давом этаётгани ва келажак режаларингиз ҳақида қисқача гапирсангиз?

- Ва алайкум ассалом. Карьерам доимгидек давом этмоқда. Ҳозирча Қатар футбол ассоциациясида ишлашда давом этяпман. Кўпчилик Жаҳон чемпионатидан кейин Қатарда футболга қизиқиш ҳамда мусобақалар камаяди дейишганди. Бироқ аксинча бўлмоқда. Ўтган йили Осиё кубогини, ундан кейин эса 23 ёшгача бўлган футболчилар ўртасида Осиё кубогини қабул қилдик. Шунингдек, қитъалараро кубок ҳамда Франция суперкубоги ҳам ўтказилди. Бундан ташқари, яна 2 та катта турнир кутиб турибди. Бу - 17 ёшгача бўлган футболчилар ўртасидаги Жаҳон чемпионати ва Араб кубоги. 17 ёшгача бўлган Жаҳон чемпионатини кимдир катта турнир эмас демаслиги мумкин. Лекин янги турнирда 24 та эмас, 48 та жамоа иштирок этади ва ташкилий жиҳатлардан ҳам бир қатор янгиликлар бўлиши кутилмоқда. Яна айтадиган бўлсам, ўтган йили Ўзбекистондаги илк жаҳон чемпионатида (футзал бўйича) ишлаш бахтига муяссар бўлдим. Аслида, Колумбияда бўладиган 20 ёшгача бўлган аёллар ўртасидаги жаҳон чемпионатига боришим керак эди, лекин ФИФА билан келишувимиздан кейин Андижонга бордим. Ўтган йили бизга алоқаси бўлмаса ҳам "Копа Америка"да ишлашга улгурдим. Шундай экан, давом этаётган карьерамдан келиб чиқиб, ўзимни бахтли инсон дейишим мумкин.

- Кўпчилик Сречко Катанецнинг йиғинларга кўп маротаба кела олмаганидан ташқари ўйин услубини ҳам кескин танқид қилди. Уларнинг айтишича, биз ҳам чиройли ўйнаб, ишончли тарзда рақибларни мағлуб этишимиз мумкин экан. Хўш, сизнинг Катанец ҳақидаги фикрларингиз қандай?

- Катанецни ишига баҳо бериш жуда қийин. Кўпчиликка унинг ўйин услуби ёқмади, аммо натижалар ёмон эмасди. Мағлубиятсиз серия, тўпланган очколар бундан далолат. Қайсидир маънода Катанецга берилган тайёргарлик имконияти бошқаларда бўлмагани ҳам ҳақиқат. Катанец 2021 йилда термани қабул қилиб, илк расмий ўйинни 1 йилдан сўнг ўтказган ва у жамоани бемалол шакллантиришга вақти бўлди. Бироқ охирги 1,5 йилда касаллиги сабабли терма йиғинларига келмаслиги ва онлайн тарзда машғулотларни ўтказиши ҳам нотўғри бўлди. Ҳаммаси у барибир лавозимини тарк этишига қараб кетаётганди. Шундай бўлса-да, у Ўзбекистон футболи тарихида энг кўп ўйин ўтказганлардан ва ғалабалар фоизи бўйича ҳам энг яхшиларидан бири бўлади. Катанецга нисбатан икки хил таассурот ўртасида қоламиз. Агар Ўзбекистон жаҳон чемпионатига чиқса, 70 фоиз ишни у қилган бўлади.

- Темур Кападзега айни вақтда бутун футбол жамоатчилиги ишонмоқда ва уни позитив кутиб олишди. Нима деб ўйлайсиз, Кападзе қўл остида терма жамоамиз Катанец давридагидан кўра яхшироқ ўйин ва натижалар кўрсатиши мумкинми? Умуман олганда, унинг мураббийлик салоҳиятига қандай баҳо бера оласиз?

- Кападзенинг термага келиш даври бироз ноқулай бўлди. Катанецнинг илк жиддий расмий ўйинигача деярли икки йил (Эронга қарши баҳс) вақт бор эди, Темурда эса атиги икки ой. Яхши ҳамки, яқинда Қатарда йиғин бўлди. Нима бўлса ҳам, битта учрашув ўтказишга улгурди (Иордания билан). Темур Кападзе билан Қатарга келганида гаплашдик. Биламизки, Сречко 5 нафар ҳимоячи билан, Темур эса 4 нафар ҳимоячи билан ўйнайди. Бироқ Кападзе тизимни ўзгартиришга вақт йўқлигини ва ишлаётган механизмни бузиб қўйишни истамаётганини айтди. Шунингдек, у Катанец билан ишлаган айрим мураббийларни ҳам қолдирмоқчи. Сабаби, улар билан ҳаммаси осонроқ бўлади. Кападзе танловига келсак, бу тўғри бўлди. Сабаби, Темур яхши натижа кўрсатган маҳаллий мураббийлардан бири, хорижлик мутахассис олиб келишга эса вақт ҳам йўқ. Бу Кападзе учун янги чақирув ва ўзини кўрсатиш учун имконият. Айтганимдек, Катанец 70 фоиз ишни қилди ва у қолган 30 фоиз ишни қилса, яна миллат қаҳрамонига айланади.

- Кўпчилик Сречко Катанецнинг йиғинларга кўп маротаба кела олмаганидан ташқари ўйин услубини ҳам кескин танқид қилди. Уларнинг айтишича, биз ҳам чиройли ўйнаб, ишончли тарзда рақибларни мағлуб этишимиз мумкин экан. Хўш, сизнинг Катанец ҳақидаги фикрларингиз қандай?

- Ўзи бу анча қийин савол. Сабаби, ҳар бир мураббийнинг ўзига яраша танлови бор. Мисол учун, сиз ёки мендан энг яхши 11 нафар футболчини танлашни сўрашса, сиздаги 11 футболчи, менинг танловимдан кескин фарқ қилиши мумкин. Ҳар бир футбол мухлиси ва мутахассисининг ўзи яхши кўрган ва кучли деб билган ўйинчилари бўлади. Менимча, кимга мураббийлик пости ишониб топширилган бўлса, унга ишониш керак ва унинг танловларини ҳурмат қилиш лозим.

- Абдуқодир Ҳусановнинг "Сити"га трансфери сўнгги пайтларда жуда кўп муҳокамаларга сабаб бўлди. "Ўзбек футболини танқид қилганлар, қанисизлар", каби фикрлар кўп олдимдан чиқди. Сизнингча, Ҳусановнинг "Сити"га ўтиши ва бундай "катта сакраш" ўзбек футболида прогресс бўлганидан, ҳаммаси яхши ишлаётганидан далолатми?

- Ҳусанов Ўзбекистон терма жамоаси аъзоси, ўзбек. Бироқ уни Ўзбекистон футболининг "маҳсулоти" дейиш қийин. Сабаби, 2022 йилдан буён Ўзбекистон клубларида ўйнамаган ва ҳаттоки "Бунёдкор"нинг ўринбосарлар таркибидан ўрин ололмаган. У Белорусга борди ва ўша ерда ўсди. Шундан сўнг U-20, олимпия ва миллий терма жамоамизга чақирилди. Шунинг учун, Ҳусановни кўрсатиб, ишларимиз зўр дейиш - кулгили. Тўғри, талантларимиз бор ва буни аввалдан айтиб келганмиз. Шундай бўлса-да, уларга имконият яратиш керак. Шундай ҳолат вужудга келдики, унга Ўзбекистонда ҳеч қандай имкон берилмади. У Белорусга борди ва у ерда Ҳусанов кашф қилинди. Шундан сўнг "Ланс"га борди ва ўзини кўрсатиб, мана ҳозир "Сити" сафига кўчиб ўтди. Шундай экан, Ҳусановнинг ўзини ўзбек футболидаги прогресс деб кўрсатиш кулгили, наздимда.

“Замин” янгиликларини “Telegram”да кузатиб боринг