Ўзбекистонда маҳаллий автоишлаб чиқариш кўрсаткичлари бироз пасайган. Статистика агентлиги маълумотларига кўра, жорий йилнинг январь–сентябрь ойларида мамлакатда 116 мингдан ортиқ Cobalt ишлаб чиқарилган. Бу ўтган йилнинг шу даврига нисбатан сал кам — 117 минг донадан бироз камроқ.
Damas ишлаб чиқариш ҳажми ҳам пасайган — 2024 йилнинг тўққиз ойида 70 мингдан ортиқ бўлган бўлса, бу йил бу кўрсаткич 67,8 мингта автомобилни ташкил этган.
Шу билан бирга, UzAuto Motors Tracker модели ишлаб чиқаришни оширган — 31 мингдан 34 мингтага етказган. Бироқ Onix сони бироз қисқарган: 24,7 мингтадан 22,5 мингтага.
Бошқа компаниялар эса аксинча, ишлаб чиқаришни фаол оширмоқда. Масалан, KIA автомобиль ҳажмини 14 мингдан 19,6 мингтагача кўпайтирган. Хитойнинг BYD бренди эса кескин ўсишга эришган — ўтган йилги 681 донадан жорий йилда 13,7 мингтагача. Шунингдек, Chery ва Haval компаниялари ҳам ўз улушини анча оширган.
UzAuto Motors эса Cobalt ва Damas моделларининг янгиланган версияларини тақдим этишга тайёрланмоқда. Янги Damas Move ва Damas Max моделлари каттароқ ўлчам, юк кўтариш салоҳияти ва қулайлик билан фарқланади.
Янгиланган Cobalt эса илгари бўлмаган 12 та янги функция билан жиҳозланади, ABS тизими такомиллаштирилган, бошқарув блоги замонавийлаштирилган. Шу билан бирга, янги “Cobalt Style МСМ” ва “Cobalt Midnight МСМ” версиялари ҳам ишлаб чиқаришга киришилади.
Мутахассислар фикрича, бу янгиланишлар маҳаллий автосаноатда рақобатбардошликни сақлаб қолиш ва ички бозор талабини қондиришда муҳим қадам бўлади.
“Zamin”ни Telegram'да ўқинг!
