Европа футболи афсонаси, УЕФАнинг собиқ президенти Мишел Платини яна жамоатчилик диққат марказида. Франциялик собиқ раҳбар ўтган ҳафта журналистлар билан суҳбатда ФИФА билан боғлиқ воқеалар ҳақида кескин баёнот берди ва ўзини “Швейцария мафияси қурбони” деб атади.
Платинининг сўзларига кўра, унга қарши айбловлар атайлаб тузилган сценарий бўлган, асосий мақсад эса уни ФИФА президенти бўлиш имкониятидан маҳрум этиш бўлган.
“ФИФА менга қарши ҳақоратли ва ёлғон айбловлар билан чиқди. Улар мени президентликка чиқишимдан тўхтатиш учун қурбон қилишди. Мен футболчи ва раҳбар сифатида фақат соф меҳр билан ишлаганман, лекин кимгадир бу ёқмаган”, — деди Платини.
Эслатиб ўтамиз, 2015 йилда Платини ўша пайтдаги ФИФА президенти Йозеф Блаттердан 2 миллион Швейцария франки олгани учун айбланганди. Бу ҳолат унинг ФИФА президентлигига номзод бўлиш имконини ёпиб, фаолиятини узоқ муддатга тўхтатган.
Бироқ 2025 йилда Швейцария апелляция суди Платини ва Блаттерни коррупция айбловларидан тўлиқ оқлади. Суд қароридан сўнг у шундай деди:
“Менинг ҳаётимдаги энг оғир йиллар ниҳоят тугади. Футбол мен учун нафақат иш, балки орзу эди. Аммо уни мендан тортиб олишди. Мен ҳеч қачон коррупция билан шуғулланмаганман — мен фақат футболни яхши кўрган одамман.”
Платини ҳозирда ФИФА раҳбарлигига қайтиш нияти йўқлигини айтди, бироқ у ҳақиқат бир куни албатта тўлиқ очилишини ишонч билан таъкидлади.
“Менинг орзум — ФИФАни тоза, шаффоф ва одил ташкилотга айлантириш эди. Аммо айрим кучлар буни хоҳламади. Улар ўша пайтда ғалаба қозонгандек бўлди, аммо ҳақиқатни абадий яшира олмайди”, — деди у.
Журналистлар Платинининг бу гапларини футбол тарихидаги энг шов-шувли баёнотлардан бири деб баҳолашди. Чунки у илк бор ФИФА ичидаги “соядаги тузум” ҳақида очиқ гапирди.
Платини 2007–2015 йиллар давомида УЕФАни бошқарган ва Европа футболида ислоҳотлар, Лига чемпионларининг янги формати ҳамда молиявий фейр-плей тизимини жорий этиш билан ёдда қолган. Унинг ташаббуслари туфайли УЕФА молиявий барқарорликни таъминлаб, клублар ўртасида тенг рақобат муҳитини яратган эди.
Шу билан бирга, у ҳозир ҳам Европадаги футбол институциялари ҳолати ҳақида фикр билдириб туради. Яқинда Платини футболдаги катта маблағлар, сиёсий таъсир ва шаффофлик муаммолари ҳақида ҳам оғир сўзлар айтганди.
Кўпчилик унинг қайтишига ишонмаса-да, Платини номини футбол тарихидан ўчиришнинг иложи йўқ. Унинг ўйин услуби, раҳбарлик маҳорати ва ҳалолликка бўлган ишончи уни ҳануз миллионлаб мухлислар учун афсона сифатида сақлаб турибди.
“Zamin”ни Telegram'да ўқинг!
