Оқ уйнинг Россияга нисбатан сиёсий йўналиши кескин ўзгариш арафасида. Bloomberg нашри ёзишича, бу ўзгаришнинг бош сабаби — давлат котиби Марко Рубио бўлди. Унинг қатъий позицияси ва Москва билан мулоқотдан кейинги хулосалари Вашингтоннинг янги йўналишини белгилаб берган.
Агентлик манбаларига кўра, Рубио Россия ташқи ишлар вазири Сергей Лавров билан телефон орқали мулоқот қилган ва Кремль тинчлик музокараларини яна чўзишга уринаётганини англаб етган. Шу сабабдан у режалаштирилган юзма-юз учрашувдан воз кечган ва президент Доналд Трампга Россияга нисбатан қаттиқ чоралар кўришни тавсия этган.
Трамп эса бу тавсияни қўллаб-қувватлади. У Будапештда Владимир Путин билан ўтказилиши керак бўлган саммитни бекор қилди ва иккинчи президентлик давридаги илк санкцияларни жорий этди. Президентнинг сўзларига кўра, «бундай чоралар кўриш вақти келган эди».
«Ҳар сафар Владимир билан мулоқот қилганимда, гўё яхши гаплашамиз, аммо бу суҳбатлар ҳеч нарсага олиб келмайди», — деди Трамп журналистлар олдида.
Bloomberg маълумотларига кўра, Россия Америка томонига Украина бўйича тинчлик шартлари лойиҳасини тақдим этган, аммо бу ҳужжат асосан Москванинг мавжуд позицияларини такрорлаган. Унда Россия томони Украина ҳудудларидан янада кўпроқ ерни талаб қилган, бу эса АҚШ маъмуриятида қаттиқ норозилик келтирган.
Москва Путин ва Трамп ўртасидаги сўнгги қўнғироқдан кейин Вашингтон Донбасснинг бир қисмини Россияга беришга рози бўлди, деб ўйлаган. Бироқ Трамп Володимир Зеленский билан учрашувдан кейин ўз позициясини аниқ ифодалади — у фақат ҳозирги фронт чизиғида ўт очишни тўхтатиш тарафдори эканини билдирди. Бу таклифни Кремль Аляска саммити арафасида рад этганди.
Шу билан бирга, Марко Рубио Москва билан дипломатик эшикларни бутунлай ёпмади. У ўз чиқишида АҚШ тинчлик имконияти бўлса, ҳамкорликка ҳамиша очиқ эканини таъкидлади. “Президент бир неча ойдан буён агар тинчлик бўлмаса, чора кўришга тўғри келиши ҳақида гапирарди. Бугун у шундай қилди”, — деди Рубио.
22 октябрь куни АҚШ маъмурияти Россиянинг йирик нефть компанияларига қарши санкцияларни амалга оширди. “Роснефть” ва “Лукойл” қора рўйхатга киритилди.
Мутахассислар фикрича, бу Вашингтоннинг Москвага нисбатан сиёсий босими кучайишининг бошланиши бўлиши мумкин.
“Zamin”ни Telegram'да ўқинг!
