Футбол эксперти Александр Точилин «Евро-Футбол.Ru»га берган интервьюсида ФИФА президенти Жанни Инфантино Россияга қўйилган бан бекор қилиниши мумкинлиги ҳақидаги фикрлари, шунингдек, Халқаро Олимпия қўмитаси яқин келажакда россиялик спортчиларга нисбатан барча санкцияларни олиб ташлаши мумкинлиги борасидаги хабарларга муносабат билдирди. Бу ҳақда euro-football.ru хабар беради.
Точилин жаҳон ОАВ Миланда ўтган йиғилишда МОҚ Россия спортига қўйилган чекловларни тез орада бекор қилиш бўйича принципиал қарорга келгани ҳақида ёзаётганини эслатиб, бундай сценарий рўй беришига ишонишни исташини айтди. Унинг таъкидлашича, бу мавзу анчадан бери муҳокамада, Европа даражасида аниқ қарор бўлмас экан, Россиянинг спортдаги изоляциясини ечиш қийин.
Эксперт фикрича, Россиясиз йирик мусобақалар интрига ва оммабоплик жиҳатидан ютқазади, буни қарор қабул қилувчилар ҳам тушунади. Шу боис у «гап амалда ҳам тасдиқлансин» деган умидини билдирди.
Инфантинонинг бир неча кун олдин Россия жамоаларига қўйилган тақиқни бекор қилиш тарафдори бўлиб чиққанини ҳақида гапираркан, Точилин бу баёнотни дунёдаги умумий кайфият ўзгараётгани билан изоҳлади. У Россияга нисбатан икки томонлама стандартлар ва холис бўлмаган ёндашув борлигини, бироқ вақт ўтиши билан бан «мантиқсиз ҳолат» экани янада аён бўлаётганини қайд этди.
Точилин МОҚ санкцияларни олиб ташласа, бу футболга ҳам бевосита таъсир қилиб, ФИФА ва УЕФА қарорларини қайта кўриб чиқишига туртки бўлишини айтди. Унинг сўзларига кўра, бундай вазиятда «занжирли реакция» юзага келади: энг каттаси биринчи қадамни қўйса, қолган ташкилотлар ҳам ортидан эргашади.
Инфантино келажакда сиёсий сабаблар туфайли жамоаларни мусобақалардан четлатишни қонунан тақиқлаш кераклигини айтгани ҳам муҳокама қилинди. Точилин спортнинг асосий шиори — сиёсатдан ҳоли бўлиши кераклигини, Россияга нисбатан қабул қилинган қарорлар эса айнан шу тамойилга зид келаётганини таъкидлади.
Шунингдек, ОАВда ФИФА апрел ойидаги конгрессда Россиянинг халқаро турнирларга тўлиқ қайтиши масаласини кўриб чиқиши мумкинлиги ҳақида ҳам ёзилмоқда. Точилин бундай муддатларда қайтиш эҳтимолини инкор этмади ва агар бундай гаплар юраётган бўлса, демак, маълумотлар бекорга тарқамаётганини билдирди.
У Россияга рухсат берилгандан кейин ҳам айрим рақиблар майдонга тушишдан бош тортиши мумкинлиги ҳақидаги саволга жавобан, ҳар бир ташкилотнинг ўз регламенти борлигини эслатди. Регламент бузилса, сабабидан қатъи назар, интизомий чоралар қўлланиши шартлигини айтган Точилин, техник мағлубиятлар белгиланса, бу бошқаларга ҳам огоҳлантирувчи сигнал бўлишини қўшимча қилди.
“Zamin”ни Telegram'да ўқинг!
