Реал Мадрид мухлислари ва Флорентино Перез ўртасида зиддият юзага келди

Сантиаго Бернабеу стадионида вазият кескинлашди. Реал Мадрид президенти Флорентино Перез Реал Овиедо жамоасига қарши ўйин вақтида трибунадаги мухлислар билан қизғин баҳсга киришди. Жамоанинг мавсумни совринсиз якунлаши ва ички низолар мухлисларнинг ғазабини келтириб чиқарган. Бу ҳақда Goal.com хабар беради.

Ўйин бошланишидан олдин, футболчилар майдонга тушаётган паллада камералар президентнинг трибунадаги мухлислар билан тортишаётганини муҳрлаб олди. Бу ҳолат клуб раҳбарияти ва мухлислар ўртасидаги чуқур тафовутни яққол кўрсатиб берди.

Стадион хавфсизлик хизмати ходимлари президентга қарши қаратилган баннерларни олиб ташлашга мажбур бўлди. Мухлислар томонидан кўтарилган "Флорентино, кет" ва "Флорентино, айбдор" каби ёзувлар дарҳол мусодара қилинди.

Мухлисларнинг норозилиги нафақат президентга, балки футболчиларга ҳам қаратилди. Айниқса, Винисиус Жуниор ва Килиан Мбаппе стадионга чиққан вақтларида кескин ҳуштакбозлик билан кутиб олинди. Айниқса, Винисиус Жуниор тўпга ҳар гал тегинганида мухлислар ўз норозилигини билдиришди.

Ушбу вазият Барселона билан бўлган El Clasico баҳсидаги йирик мағлубиятдан сўнг янада кучайди. Мавсумнинг муваффақиятсиз ўтиши ва жамоанинг ўйини мухлисларни қониқтирмаяпти.