«Ал-Наср» бош мураббийи Жорже Жезуш Криштиану Роналду нега яқинлашиб келаётган ўйинда майдонга тушмаслигини изоҳлади. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида «Аркадаг»га қарши баҳс олиб боради. Португалиялик юлдуз ҳужумчининг яқин орада майдонга қайтиши кутилаётганди, бироқ бу сафар ҳам у қайдномадан жой олмайди.
Жезушнинг таъкидлашича, жамоа зич тақвим сабаб Роналду ва асосий таркибдаги бир қатор футболчиларга дам беришга қарор қилган. Мураббий бунинг асосий сабаби сифатида «Ал-Фатеҳ»га қарши муҳим ўйин олдидан кучни тежаш зарурлигини кўрсатди.
Al Nassr Zone келтирган иқтибосда Жезуш: «Роналдунинг дам олиши янгилик эмас. Бу унинг Саудия Арабистонидан ташқарида ўтказиладиган учрашувларда илк бор иштирок этмаётгани эмас», — деди.
Саудия чемпионатидаги «Ал-Фатеҳ» — «Ал-Наср» учрашуви шанба, 14 февраль куни бўлиб ўтади.
“Zamin”ни Telegram'да ўқинг!
