Шу ой бошида Anthropic компанияси 300 мегаваттли ҳисоблаш қувватини сотиб олиш бўйича келишувга эришиб, сунъий интеллект оламини ҳайратда қолдирди. Компания Теннесси штатининг Мемфис шаҳри яқинида жойлашган Колоссус 1 маълумотлар марказининг бутун қувватини банд қилди. Маълум бўлишича, бундай миқёсдаги ҳисоблаш ресурслари арзон турмайди. Бу ҳақда Techcrunch.com хабар беради.
SpaceX компаниясининг SEКга тақдим этган С-1 ҳужжатларига кўра, Anthropic 2029-йилнинг май ойига қадар xAI компаниясига ҳар ой 1,25 миллиард доллар тўлаб боради. Дастлабки икки ойда xAI ўз қувватларини тўлиқ ишга туширгунига қадар чегирмали тариф амал қилади. Умумий ҳисобда ушбу келишув xAI учун 40 миллиард доллардан ортиқ даромад келтириши кутилмоқда.
Ушбу битим xAI компаниясига инфратузилмадаги фойдаланилмаётган ҳисоблаш қувватларини монетизация қилиш имконини беради. Шартнома шартларига кўра, ҳар икки томон ҳам 90 кунлик огоҳлантириш билан келишувни бекор қилиши мумкин. Компания келажакда бошқа шунга ўхшаш хизмат кўрсатиш шартномаларини имзолашни режалаштираётганини маълум қилди.
Мазкур қадам xAI'ни бозорда гибрид ўйинчига айлантирди. Одатда компаниялар маълумотлар марказларини ёки ўзлари учун, ёки бошқаларга ижарага бериш учун қурадилар. "Неоклоуд" деб аталаётган ушбу янги модел AI компанияларига ўз ресурслари ортиб қолганда булутли провайдер сифатида иш юритиб, инфратузилма харажатларини қоплаш имконини беради.
Таҳлилчиларнинг фикрича, xAI ўз ҳисоблаш қувватларини ҳаддан ташқари кўп қуриб юборган ва энди уларни оммавий акциялар савдосига чиқишдан олдин монетизация қилиш йўлларини қидирмоқда. Сўнгги ойларда xAI'нинг асосий ёрдамчиси бўлган Grok фойдаланувчилари сони сезиларли даражада камайгани сабабли бўшаб қолган серверлар эндиликда унинг энг яқин рақобатчисига сотилмоқда.
“Zamin”ни Telegram'да ўқинг!
