«Ал-Наср» бош мураббийи Жорже Жезуш Криштиану Роналду яқинлашиб келаётган баҳсда майдонга тушмаслигини изоҳлади. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида «Аркадаг»га қарши ўйнайди. Португалиялик юлдуз футболчи тез орада жамоага қайтиши кутилаётган бўлса-да, бу сафарги учрашувда ҳам у рўйхатдан жой олмайди.
Жезушнинг таъкидлашича, тигʻиз тақвим сабаб Роналду ва асосий таркибдаги яна бир нечта футболчига дам бериш қарори қабул қилинган. Мураббий буни олдинда турган «Ал-Фатеҳ»га қарши муҳим ўйин билан изоҳлади.
Al Nassr Zone келтирган иқтибосда Жезуш шунингдек, Роналдунинг дам олиши янгилик эмаслигини, айниқса Саудия Арабистонидан ташқарида ўтадиган ўйинларда у аввал ҳам бир неча бор иштирок этмаганини эслатиб ўтди.
Саудия Про-лигасидаги «Ал-Фатеҳ» – «Ал-Наср» учрашуви шанба куни, 14 февралда бўлиб ўтади.
“Zamin”ни Telegram'да ўқинг!
