Бразилиялик иқтидорли ҳужумчи Эндрик ўзининг келажаги борасида кутилмаган фикрлар билдирди. Ҳозирда ижара асосида Франциянинг "Лион" клубида тўп сураётган футболчи фаолиятини айнан шу жамоада давом эттириши мумкинлигини инкор этмади. Бу ҳақда Goal.com хабар беради.
Ҳужумчи агар "Лион" мавсум якунида Европа Чемпионлар лигаси йўлланмасини қўлга киритса, жамоада қолиш масаласини кўриб чиқишга тайёр. Эндрик январь ойида Францияга кўчиб ўтганидан сўнг ўзининг энг яхши спорт формасига қайтишга муваффақ бўлди.
«Агар жамоа Чемпионлар лигасига йўлланма олса, қоламанми? Ростини айтсам, буни билмайман.
Биз олти ойлик ижара бўйича келишганмиз, аммо "Реал Мадрид"га қайтиш керак бўлса, мамнуният билан қайтаман», — деди бразилиялик футболчи.
19 ёшли ҳужумчи Франция чемпионатидаги дастлабки 13 та ўйинида 10 та голда иштирок этиб, мутахассислар эътиборини тортди. Испанияда ўйин амалиёти камлигидан норози бўлган футболчи учун бу ўзгариш фаолиятини қайта тиклашга ёрдам берди.
Эндрик майдонда марказий ҳужумчи сифатида ўйнашни афзал кўришини ҳам таъкидлади. Унинг келажаги бўйича якуний қарор мавсум охирида, "Лион"нинг турнир жадвалидаги ўрнига қараб қабул қилиниши кутилмоқда.
“Zamin”ни Telegram'да ўқинг!
