"HD Hyundai Ҳеавй Индустриес" компанияси АҚШнинг "Аперион Энергй Гроуп" корхонаси билан маълумотлар марказлари учун электр энергияси ишлаб чиқариш тизимларини етказиб бериш бўйича йирик шартнома имзолади. Келишувнинг умумий қиймати 400 млн доллардан ошади ва ускуналар жами 684 мегаватт қувватга эга бўлади. Бу ҳақда Ixbt.com хабар беради.
Бу шартнома компания тарихидаги двигателлар етказиб бериш бўйича энг йирик битимга айланди.
Лойиҳа доирасида Жанубий Корея гиганти ўзининг "HiMSEN" русумли двигателларини тақдим этади. Ушбу қурилмаларнинг ҳар бири тахминан 20 МВт ёки 27 200 от кучига тенг қувват билан ишлайди.
Мазкур қадам "Hyundai" учун янги сегмент — сунъий интеллект ва булутли хизматлар ривожланиши фонида талаб тез ўсаётган маълумотларни қайта ишлаш марказлари бозорига киришни англатади.
Компаниянинг двигателлар ва машинасозлик бўлими раҳбари Хан Жу Сокнинг сўзларига кўра, ушбу шартнома Шимолий Америка бозорида позицияларни мустаҳкамлашда муҳим аҳамиятга эга. "Hyundai" эндиликда нафақат кемасозлик ва оғир машинасозлик, балки рақамли инфратузилмани қўллаб-қувватловчи энергетика ечимлари йўналишини ҳам фаол ривожлантиришни режалаштирмоқда.
"HiMSEN" двигателлари компаниянинг ўз ишланмаси бўлиб, улар кема ва электр станцияларида кенг қўлланилади. Ушбу тўрт тактли двигателлар дизель, газ ёки уларнинг комбинатсиясида ишлаш имкониятига эга бўлиб, юқори самарадорлиги билан ажралиб туради.
“Zamin”ни Telegram'да ўқинг!
