"Манчестер Юнайтед" ҳужумчиси Бенямин Сеско Англия премьер лигасидаги дебют мавсумидан сўнг ўз режалари билан ўртоқлашди. Словениялик футболчи "Олд Траффорд"да совринлар ютишни ва жамоанинг муваффақиятларига ҳисса қўшишни ният қилган. Бу ҳақда Goal.com хабар беради.
Сеско ўтган ёзда "RB Лейпциг" клубидан трансфер қилинган эди. У жамоанинг ҳозирги ҳолати ва вақтинчалик мураббий Майкл Каррик бошқарувидаги ўзгаришларни юқори баҳолади.
Футболчининг фикрича, клуб тўғри йўналишда ривожланмоқда.
«Биз ажойиб натижалар кўрсатмоқдамиз. Жамоада кучли руҳ шаклланган.
Мен бу ерда совринлар ютишни жуда хоҳлайман. Бунинг учун кўп меҳнат қилишимиз керак, аммо бизда бунга етарли салоҳият бор», — деди Сеско.
Каррик январь ойида жамоани қабул қилиб олганидан бери клубдаги муҳит сезиларли даражада ўзгарди. "Манчестер Юнайтед" сўнгги 12 та ўйиннинг 8 тасида ғалаба қозониб, Чемпионлар лигаси йўлланмаси учун курашга қайтди.
22 ёшли ҳужумчи жорий мавсумда барча мусобақаларда 10 та гол уришга муваффақ бўлди. У тажрибали футболчилар ва мураббийлар штабидан кўп нарсани ўрганаётганини ҳамда Манчестердаги ҳаёт унга маъқул келаётганини таъкидлади.
Душанба куни жамоа "Брентфорд"га қарши майдонга тушади. Таркибда айрим муаммолар мавжуд: Лисандро Мартинес дисквалификация сабабли ўйинни ўтказиб юборади.
Ленй Ёронинг ҳолати эса тиббий кўрикдан сўнг аниқ бўлади. Гарри Магуайр эса сафга қайтган.
“Zamin”ни Telegram'да ўқинг!
