Жаҳон миқёсида экологик тоза транспорт воситаларига бўлган талаб тобора ортиб бормоқда. Германиянинг Қуёш энергияси ва водород тадқиқотлари маркази (ZSW) томонидан ўтказилган тадқиқот натижаларига кўра, 2025 йил якунига бориб дунёда электромобиллар сони 74 миллионга етган. Бу кўрсаткич 2024 йилга нисбатан қарийб 19 миллионга кўп экани билан эътиборлидир.
Мазкур статистикага тўлиқ электрли автомобиллар, гибрид транспорт воситалари ҳамда юриш масофаси узайтирилган электромобиллар ҳам киритилган. Бу ҳақда Германиянинг халқаро ахборот хизмати — Deutsche Welle хабар берди.
Ҳисоботга кўра, электромобилларнинг ярмидан кўпи Хитойда фойдаланилмоқда — бу мамлакатда уларнинг сони 44 миллиондан ошган. Шунингдек, энг кўп электромобилга эга давлатлар қаторига АҚШ (7 миллион), Германия (3,2 миллион), Буюк Британия (2,8 миллион) ва Франция (2,5 миллион) кирган.
Қизиқарли жиҳати шундаки, Европанинг 14 та йирик давлати биргаликда ҳисобланганда, уларнинг умумий улуши 16 миллиондан ортиқни ташкил этиб, АҚШдан анча юқори натижани кўрсатмоқда.
ZSW вакили Андреас Пюттнернинг таъкидлашича, сўнгги вақтларда ёқилғи нархларининг кескин ўзгариши электромобилларга бўлган қизиқишни янада кучайтирган. Унинг фикрича, электромобил эгалари қазиб олинадиган ёқилғига камроқ боғлиқ бўлиб, нархлар тебранишидан яхшироқ ҳимояланган.
Ишлаб чиқарувчилар ўртасида эса Хитойнинг BYD компанияси етакчилик қилмоқда. Ундан кейинги ўринларни АҚШнинг Tesla компанияси ҳамда Германиянинг Volkswagen концерни эгаллаган.
Мутахассислар фикрича, яқин йилларда электромобиллар бозори янада кенгайиб, анъанавий ёқилғида ишловчи автомобиллар улуши аста-секин камайиб бориши кутилмоқда.
“Zamin”ни Telegram'да ўқинг!
