Ispaniya La Ligasi doirasida bo'lib o'tgan uchrashuvda "Barselona" jamoasi safarda "Xetefe" ustidan ishonchli g'alabaga erishdi. O'yin davomida to'liq ustunlikka ega bo'lgan mehmonlar raqib darvozasiga javobsiz ikkita to'p kiritishga muvaffaq bo'lishdi. Birinchi bo'limning qo'shib berilgan daqiqalarida Lopes hisobni ochgan bo'lsa, ikkinchi bo'limda Rashford oradagi farqni oshirdi.
Statistik ma'lumotlarga ko'ra, "Barselona" o'yin davomida 76 foiz to'p nazoratini o'zida saqlab turgan. Mehmonlar jami 10 ta zarba yo'llagan bo'lib, ulardan 4 tasi darvoza sohasiga aniq borgan. Mezbonlar esa butun o'yin davomida faqat bir marta darvoza sohasiga aniq zarba bera olishdi. Shuningdek, kataloniyaliklar 562 ta pas amalga oshirib, 91 foizlik aniqlik ko'rsatishdi.
Uchrashuv ancha keskin kurashlarga boy bo'ldi, buni hakam tomonidan ko'rsatilgan to'rtta sariq kartochka ham tasdiqlaydi. Har ikki jamoa a'zolari ikki martadan ogohlantirish olishdi. "Xetefe" futbolchilari 15 marta qoida buzgan bo'lsa, "Barselona" vakillari 8 marta follar qayd etishdi. Ushbu g'alaba orqali mehmonlar turnir jadvalidagi o'z o'rinlarini mustahkamlab olishdi.
“Zamin”ni Telegramʻda oʻqing!
