UzAuto Motors Cobalt учун онлайн шартномаларни очишини маълум қилди
UzAuto Motors компанияси 2026 йил 28 апрель куни соат 10:00 дан бошлаб Chevrolet Cobalt автомобиллари учун онлайн шартнома бериш жараёни бошланишини эълон қилди. Харидорлар шартномаларни UzAvtoSavdo платформаси, мобил илова ёки расмий дилерлик марказлари орқали расмийлаштиришлари мумкин. Белгиланган тартибга кўра, тўлов 7 календар кун ичида амалга оширилиши лозим ва ҳар бир шартномада ҳақиқийликни тасдиқловчи махсус QR-код бўлиши шарт.
UzAuto Motors компанияси Chevrolet Cobalt автомобиллари учун онлайн шартнома расмийлаштириш жараёни бошланишини расман эълон қилди. Бу ҳақда корхона ахборот хизмати маълумот тарқатди.
Таъкидланишича, Cobalt моделига бўлган катта қизиқиш ҳамда мижозлардан келиб тушаётган кўплаб таклиф ва сўровлар ҳисобга олиниб, контракт тузиш жараёни барча турдаги комплектациялар учун йўлга қўйилади.
2026 йил 28 апрель куни соат 10:00 дан эътиборан барча харидорлар учун онлайн шартномаларни очиш режалаштирилган. Автомобил сотиб олиш истагидаги фуқаролар шартномани UzAvtoSavdo платформаси орқали расмийлаштиришлари ёки ўзларига яқин бўлган Chevrolet расмий дилерлик марказларига мурожаат қилишлари мумкин.
Шу билан бирга, Telegram-бот ҳамда UzAvtoSavdo мобил дастури (iOS/Android) орқали навбатни назорат қилиш ва мавжуд автомобиллар ҳақида тезкор ахборот олиш имконияти ҳам яратилган.
Компания эслатишича, расмийлаштирилган шартномалар бўйича тўловни 7 календар кун ичида амалга ошириш талаб этилади.
Бундан ташқари, ҳар бир шартномада махсус QR-код мавжуд бўлиши шартлиги алоҳида қайд этилди. Мазкур код ҳужжатнинг ҳақиқийлигини тасдиқлайди. QR-кодсиз тақдим этилган шартномалар UzAuto Motors ёки унинг расмий дилерларига тегишли эмаслиги билдирилди.
Изоҳлар 0
…