Ekologiya va iqlim o‘zgarishi bo‘yicha qo‘mita 2026 yildan boshlab «qizil» va «sariq» stikeri mavjud avtomobillar ekohududlarga kirgani uchun darhol jarimaga tortiladi, degan xabarlar haqiqatga to‘g‘ri kelmasligini bildirdi. Qo‘mita ma’lumotlariga ko‘ra, bunday talablar bosqichma-bosqich joriy etiladi va jarima choralari faqat 2028 yildan amal qila boshlaydi.
Ta’kidlanishicha, ushbu oraliq davr haydovchilarga o‘z transport vositalarini texnik jihatdan yaxshilash, chiqindilar miqdorini kamaytirish va ekologik talablarga moslashish imkonini beradi. Avtomobil egalari texnik diagnostikadan o‘tib, zarur sozlash ishlarini amalga oshirgandan so‘ng «yashil» stiker olishlari mumkin bo‘ladi.
Shuningdek, yangilangan tizim doirasida ekohududlarga kirish masalasida haydovchilar oldindan ogohlantiriladi. Buning uchun videokuzatuv kameralari va elektron axborot platformalari orqali xabar berish mexanizmi joriy etiladi. Ya’ni, maqsad haydovchini kutilmaganda jazolash emas, balki uni tayyorlash va xabardor qilishdir.
Qo‘mita vakillarining aytishicha, asosiy maqsad jarima yig‘ish emas, balki «Ekologik transport» konsepsiyasini aholi orasida keng targ‘ib qilish, shaharlarda havo sifatini yaxshilash va atrof-muhitni muhofaza qilishdan iborat. Shu bois, kelgusi yillar mobaynida fuqarolarga qulay sharoit yaratish va ekologik madaniyatni oshirishga alohida e’tibor qaratilmoqda.
Mehmon guruhidagi foydalanuvchilar ushbu nashrga izoh qoldira olmaydi.
