Xitoy avtomobil bozori ulkan hajm, tezkor rivojlanish va qattiq raqobat bilan ajralib turadi. Ammo hajm har doim sifat degani emas. Shu bois, mahalliy bozorda qaysi yengil avtomobillar eng ishonchli va muammosiz ekanini aniqlash har doim qiziq mavzu bo‘lib kelgan. Ana shu maqsadda China Automotive Quality Net — Xitoy avtomobillar sifati tarmog‘i — mahalliy zavodlarda ishlab chiqarilgan yengil mashinalarning sifat reytingini tuzdi.
Reyting natijalari kutilganidek ham, kutilmagan tarzda ham yakunlandi. Birinchi o‘rinni Audi Q6 modeli egalladi. U SAIC–Volkswagen qo‘shma korxonasida ishlab chiqariladi va foydalanuvchilardan salbiy fikrlar juda kam kelib tushgan. Natijada Audi Q6 atigi 140 ta “jarima” ballini to‘plab, reyting yetakchisiga aylandi. Bu ko‘rsatkich avtomobilda kamchiliklar juda oz ekanini anglatadi.
Ikkinchi va uchinchi o‘rinlar Honda modellariga nasib etdi. Xususan, Honda UR-V 142 ball bilan ikkinchi, Honda XR-V esa 143 ball bilan uchinchi pog‘onani egalladi. Har ikki model ham Honda–Dongfeng qo‘shma korxonasida ishlab chiqariladi. Mutaxassislar bu natijani Honda’ning Xitoy bozorida uzoq yillar davomida shakllangan ishonchli imidji bilan bog‘lamoqda.
To‘rtinchi o‘rindan Audi’ning yana bir modeli — Q2L joy oldi. FAW–Volkswagen qo‘shma korxonasi mahsuloti bo‘lgan ushbu krossover 145 “jarima” balli bilan reytingda yuqori o‘rinni saqlab qoldi. Beshinchi pog‘ona esa Honda Avancier’ga nasib etdi. Honda–GAC zavodida ishlab chiqarilgan bu model 146 ball to‘plab, eng sifatli beshlikni yakunladi.
E’tiborli jihati shundaki, ushbu reyting to‘liq Xitoyda ishlab chiqarilgan avtomobillar asosida va xitoylik iste’molchilarning o‘z fikrlari hamda shikoyatlari hisobga olingan holda tuzilgan. Ammo ro‘yxat tepasida birorta ham milliy xitoy brendi yo‘q. Barcha yetakchi o‘rinlarni xorijiy markalar bilan qo‘shma korxonalarda ishlab chiqarilgan modellar egallagan.
Bu holat Xitoy avtosanoati uchun jiddiy signal sifatida qabul qilinmoqda. Bir tomondan, mahalliy ishlab chiqarish infratuzilmasi yuqori darajada ishlayotganini ko‘rsatsa, ikkinchi tomondan, milliy brendlar hali ham sifat bo‘yicha yetakchilardan ortda qolayotganini ochiq namoyon qiladi.
Xulosa qisqa: Xitoyda avtomobil ko‘p, lekin sifat masalasida hali ham nom va tajriba hal qiluvchi omil bo‘lib qolmoqda. Milliy brendlar esa yuqori pog‘onalarga chiqish uchun yana biroz “gazni bosishi”ga to‘g‘ri keladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
