Olimlar Yer qachon yashash uchun yaroqsiz bo‘lib qolishini aniqladi

Olimlar Yer sayyorasida hayot qanchalik uzoq davom etishini tadqiq qilib, hayratlanarli xulosaga kelishdi. Nature Geoscience jurnalida e’lon qilingan maqolaga ko‘ra, Yerdagi kislorod zaxiralari asta-sekin yo‘qolib, taxminan 1 000 002 021 yildan keyin sayyora yashash uchun mutlaqo yaroqsiz bo‘lib qoladi.

NASA va Yaponiyaning Toxo universiteti olimlari ushbu xulosaga kelish uchun 400 ming kompyuter simulyatsiyasini o‘tkazgan. Ular Yer atmosferasining uzoq muddatli evolyutsiyasini tahlil qilib, kislorodning tugashi tabiiy ravishda, Quyoshdagi anomal o‘zgarishlar natijasida sodir bo‘lishini aniqlashdi.

Kislorod apokalipsisi: Yerni nimalar kutmoqda?

Tadqiqotlarga ko‘ra, Yerdagi kislorod tanqisligi ozon qatlamining buzilishi tufayli yuzaga keladi. Bu jarayon natijasida atmosferadagi kislorod asta-sekin bug‘lanib ketadi va hayot uchun zarur bo‘lgan muhit yo‘qoladi.

Bunday sharoitda faqat anaerob bakteriyalar, ya’ni kislorodsiz yashay oladigan mikroorganizmlargina omon qolishi mumkin. Barcha kislorodga bog‘liq tirik mavjudotlar esa yo‘q bo‘lib ketadi.

Hayot ancha erta tugashi mumkin

Shu bilan birga, olimlar Yerda hayot ming milliard yil emas, balki ancha erta tugashi mumkin ekanligini ham ta’kidlamoqda. Sababi, global iqlim o‘zgarishlari, asteroidlar bilan to‘qnashuv, vulqon faolligi yoki boshqa tabiiy ofatlar sayyorani yashash uchun yaroqsiz holga keltirishi mumkin.

Buyuk Britaniyaning Bristol universiteti olimlari esa superkompyuter yordamida olib borgan tadqiqotlari natijasida Yer 250 million yildan so‘ng butunlay yaroqsiz bo‘lib qolishi mumkinligini taxmin qilishgan. Ularning fikricha, bu global isish va katta tabiiy ofatlar sababli sodir bo‘ladi.

Texnologiya hayotni saqlab qolishga yordam beradimi?

Olimlarning fikricha, texnologiyaning rivojlanishi va fan taraqqiyoti bu tahdidlarning oldini olish yoki ularni yumshatishga yordam berishi mumkin. Kelajakda insonlar kosmik muammolarga qarshi kurashish yo‘llarini topishi, hatto boshqa sayyoralarga ko‘chib o‘tish imkoniyati paydo bo‘lishi mumkin.

Shunday qilib, Yerda hayot abadiy davom etmaydi, lekin inson sivilizatsiyasi ilmiy taraqqiyot orqali o‘z kelajagini kafolatlash uchun yangi yechimlarni topishi kerak. “Zamin” yangiliklarini “Telegram”da kuzatib boring