Олимлар Ер қачон яшаш учун яроқсиз бўлиб қолишини аниқлади

Олимлар Ер сайёрасида ҳаёт қанчалик узоқ давом этишини тадқиқ қилиб, ҳайратланарли хулосага келишди. Nature Geoscience журналида эълон қилинган мақолага кўра, Ердаги кислород захиралари аста-секин йўқолиб, тахминан 1 000 002 021 йилдан кейин сайёра яшаш учун мутлақо яроқсиз бўлиб қолади.

NASA ва Япониянинг Тохо университети олимлари ушбу хулосага келиш учун 400 минг компьютер симуляциясини ўтказган. Улар Ер атмосферасининг узоқ муддатли эволюциясини таҳлил қилиб, кислороднинг тугаши табиий равишда, Қуёшдаги аномал ўзгаришлар натижасида содир бўлишини аниқлашди.

Кислород апокалипсиси: Ерни нималар кутмоқда?

Тадқиқотларга кўра, Ердаги кислород танқислиги озон қатламининг бузилиши туфайли юзага келади. Бу жараён натижасида атмосферадаги кислород аста-секин буғланиб кетади ва ҳаёт учун зарур бўлган муҳит йўқолади.

Бундай шароитда фаqat анаэроб бактериялар, яъни кислородсиз яшай оладиган микроорганизмларгина омон қолиши мумкин. Барча кислородга боғлиқ тирик мавжудотлар эса йўқ бўлиб кетади.

Ҳаёт анча эрта тугаши мумкин

Шу билан бирга, олимлар Ерда ҳаёт минг миллиард йил эмас, балки анча эрта тугаши мумкин эканлигини ҳам таъкидламоқда. Сабаби, глобал иқлим ўзгаришлари, астероидлар билан тўқнашув, вулқон фаоллиги ёки бошқа табиий офатлар сайёрани яшаш учун яроқсиз ҳолга келтириши мумкин.

Буюк Британиянинг Бристол университети олимлари эса суперкомпьютер ёрдамида олиб борган тадқиқотлари натижасида Ер 250 миллион йилдан сўнг бутунлай яроқсиз бўлиб қолиши мумкинлигини тахмин қилишган. Уларнинг фикрича, бу глобал исиш ва катта табиий офатлар сабабли содир бўлади.

Технология ҳаётни сақлаб қолишга ёрдам берадими?

Олимларнинг фикрича, технологиянинг ривожланиши ва фан тараққиёти бу таҳдидларнинг олдини олиш ёки уларни юмшатишга ёрдам бериши мумкин. Келажакда инсонлар космик муаммоларга қарши курашиш йўлларини топиши, ҳатто бошқа сайёраларга кўчиб ўтиш имконияти пайдо бўлиши мумкин.

Шундай қилиб, Ерда ҳаёт абадий давом этмайди, лекин инсон цивилизацияси илмий тараққиёт орқали ўз келажагини кафолатлаш учун янги ечимларни топиши керак. “Замин” янгиликларини “Telegram”да кузатиб боринг