Hindistonda o‘qituvchi tayinlagan og‘ir jazo 12 yoshli qizcha hayotiga nuqta qo‘ydi. NDTVning yozishicha, Kajal Gond ismli o‘quvchi maktabga 10 daqiqa kech kelgani uchun 100 marta o‘tirib-turish mashqini bajarishga majburlangan. Jazodan keyin beli qattiq og‘riqqa tushib, ahvoli kun davomida yanada og‘irlashgan.
Qiz avval Nallasoparadagi shifoxonaga yotqizilgan, keyin esa holati yomonlashgani uchun Mumbaydagi kasalxonaga ko‘chirilgan. Ammo shifokorlar harakatlariga qaramay, u davolanish vaqtida vafot etgan.
Kajalning ota-onasi bu fojiani aynan o‘qituvchi bergan jazo keltirib chiqarganini aytishgan. Ularga ko‘ra, qiz 100 marta cho‘kkalab turish mashqini bajarayotganda maktab sumkasini yelkasidan tushirmagan va bu og‘riqni yanada kuchaytirgan.
OAV ma’lumotlarida o‘limning aniq sababi hali e’lon qilinmagan. Qiz qanday tashxis bilan shifoxonaga yotqizilgani, qancha vaqt davolangani yoki avvaldan qandaydir tibbiy muammosi bo‘lgan-bo‘lmagani haqida ham ma’lumot berilmagan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
