Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) hisobotiga ko‘ra, joriy yil boshidan buyon dunyo bo‘yicha go‘sht narxlari o‘rtacha 7 foizga oshgan. Ushbu o‘sishda eng yuqori ko‘rsatkich qo‘y go‘shtida qayd etilgan — 31 foiz.
FAO ma’lumotlariga ko‘ra, 2025 yilda O‘zbekistonda qo‘y go‘shti ishlab chiqarish hajmi oshishi kutilmoqda. Qo‘y go‘shti jahon go‘sht bozorida eng dinamik rivojlanayotgan va taqchillik mavjud bo‘lgan segment bo‘lib qolmoqda.
Hozirda ushbu mahsulot narxi tarixiy maksimal darajaga yetgan. Avstraliya va Yangi Zelandiyadan kelayotgan ta’minot jahon bozoridagi talabni qoplay olmayapti.
Eksportchilar esa daromadli bo‘lgan AQSH va Yevropa Ittifoqi mamlakatlari kabi premium bozorlariga yo‘nalmoqda. 2025 yilda O‘zbekiston dunyoda qo‘y go‘shti ishlab chiqarish hajmi oshadigan kam sonli bozorlar qatoriga kiradi.
Bu esa yem bazasining mustahkamlanishi va qo‘ychilik sohasida modernizatsiya ishlari olib borilishi bilan izohlanmoqda. Dunyo bo‘yicha mol go‘shti narxi 12 foizga, cho‘chqa go‘shti esa 7 foizga oshgan.
Istisno holat sifatida tovuq go‘shti ko‘rsatilib, ishlab chiqarishning 2,9 foizga oshishi sababli uning narxi pasaymoqda. 2025 yilda jahon bo‘yicha go‘sht savdosi hajmi 43 million tonnagacha yetishi kutilmoqda.
Asosiy o‘sish omili AQSHdagi mol go‘shti bozoriga bo‘lgan yuqori talab bo‘lib, bu yerda mahalliy ishlab chiqarish hajmi talabni qoplash uchun yetarli emas. Yangi tariflar sababli Braziliya AQSHga yetkazib berishni qisqartirib, Xitoy bozoriga yo‘nalmoqda.
Tovuq go‘shti bozorida esa Xitoy, Tailand va Turkiya kabi kichik eksportchilar faol o‘sib, yirik yetkazib beruvchilarning bozor ulushini qisqartirmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
