O‘zbekiston moliya bozorida e’tiborga molik o‘zgarish qayd etildi. Anor Bank'ning asosiy aksiyadori hisoblangan Kahramonjon Olimov bankdagi ulushini keskin qisqartirdi. Yagona korporativ ma’lumotlar portalida e’lon qilingan rasmiy ma’lumotlarga ko‘ra, uning ulushi 99,38 foizdan 49,38 foizgacha pasaygan.
Ma’lum bo‘lishicha, Olimovga tegishli bo‘lgan aksiyalarning 50 foizi Niderlandiyada ro‘yxatdan o‘tgan Bekamin B.V. kompaniyasi ixtiyoriga o‘tgan. Bu bitim bank aksiyadorlik tarkibida yangi bosqich boshlanganidan dalolat beradi. Mutaxassislar bu o‘zgarishni Anor Bank'ning xalqaro sheriklar bilan hamkorlikni kengaytirishga qaratilgan qadami sifatida baholamoqda.
Shu bilan birga, bankning bozordagi o‘rni ham diqqatga sazovor. Joriy yilning uchinchi choragi yakunlari bo‘yicha O‘zbekiston banklari faoliyati reytingida Anor Bank 20 ta tijorat banki orasida oltinchi o‘rinni egalladi. Bu ko‘rsatkich ikkinchi chorak bilan solishtirilganda, bir pog‘onaga pasaygan bo‘lsa-da, bank hali ham yetakchi moliya institutlari qatorida qolmoqda.
Moliyaviy natijalar ham barqaror o‘sishni ko‘rsatmoqda. Oktyabr oyi boshida bankning sof foydasi 235,9 milliard so‘mdan oshib ketgan. Umumiy aktivlar hajmi esa 13,5 trillion so‘m atrofida baholanmoqda. Bu raqamlar Anor Bank'ning moliyaviy salohiyati yuqori ekanini va bozorda mustahkam o‘ringa ega bo‘lib borayotganini anglatadi.
Ekspertlar fikricha, aksiyadorlik tarkibidagi ushbu o‘zgarish bank strategiyasiga yangi imkoniyatlar olib kelishi mumkin. Yaqin kelajakda Anor Bank faoliyatida yangi loyihalar va xalqaro hamkorliklar ko‘payishi ehtimoldan xoli emas.
Mehmon guruhidagi foydalanuvchilar ushbu nashrga izoh qoldira olmaydi.
