Krishtianu Ronaldu kelajagini bosqichma-bosqich ochayotgandek: yakun haqida gap ketishi bilan hamma yana yangi bobni kutadi. Jurnalist Ben Jeykobs bergan ma’lumotlarga ko‘ra, afsonaviy portugaliyalik 2027 yilda «Al-Nasr»ni tark etishi ehtimoli bor. Bu haqda euro-football.ru xabar beradi.
Gap-so‘zlardan qat’i nazar, raqamlar hammasini aytib turibdi: Ronalduning yoshi 40 da.
U faoliyati davomida 960 ta gol urdi va minglik marraga yetish istagi hanuz kuchli. Saudiya Arabistonidagi shartnomasi 2027 yilgacha, «Al-Nasr» safida esa 125 o‘yinda 110 ta gol muallifi bo‘lgan.
Bu statistika nafaqat sport natijasi, balki Ronalduning kayfiyati hamon o‘sha-o‘sha ekanini ko‘rsatadi. U oilasi “to‘xtash vaqti keldi” deb maslahat berishini yashirmaydi, lekin o‘zi hali klub va terma jamoaga foydasi tegayotganini ta’kidlaydi. Uning intizomi go‘yo tizimga aylangan: tana — kapital, rekord — valuta.
Ronaldu A Bola nashriga bergan fikrida ham aynan shu pozitsiyani qaytaradi:
«Menimcha, hali ham yaxshiman, klubimga va terma jamoamga yordam beryapman, unda nega davom ettirmasligim kerak?»
Shu bilan birga, futbol tashqarisidagi olam unga boshqa yo‘lni ham taklif qilyapti. «Manchester Yunayted», «Nyukasl», «Vilyarreal» va «Fiorentina»ning sobiq hujumchisi Juzeppe Rossi Goal.com’ga intervyusida Ronalduni Gollivudga chorlab, hatto Joker kabi salbiy qahramon rolini ham tilga oldi. Fransiya terma jamoasi, «Arsenal» va «Barselona»ning sobiq yarim himoyachisi Emmanuel Peti esa Hochgepokert’da bu g‘oyani yanada “kattalashtirib”, hatto «Oskar» haqida ham gapirdi.
Bu takliflar bekorga yangramaydi: Ronaldu allaqachon oddiy futbolchi emas, u butun bir brend. Uning «Al-Nasr»dan shunchaki «Benfika»ga qaytishidan ko‘ra, Warner Bros pavilyoniga kirib borishi ham mantiqiyroq ko‘rinadi. Kamera uni zarbadan kam yaxshi ko‘rmaydi, shu ma’noda “yangi Joker” g‘oyasi ham kutilmagan emas: u auditoriyani pauza bilan ham “ushlab turish”ni biladi.
Ammo asosiy intriga kinoda emas. Gap shundaki, Ronaldu ilk bor futboldan keyin ham diqqat markazida qolish vazifasi bilan yuzma-yuz kelyapti. Yana bir detal: «Al-Nasr» uni ushlab qolish uchun klubdagi ulushi bo‘yicha taklifni 15 foizgacha oshirishi mumkinligi ham aytilmoqda.
Bu fon ortida Madeyrada Ronalduning haykaliga o‘t qo‘yishga urinish bo‘lgani, politsiya vandaldan iz olgani haqida xabarlar tarqaldi. Ronaldu esa navbatdagi golidan keyin “Ishonishda davom etamiz, kurashishda davom etamiz” degan mazmunda post qoldirdi. Go‘yo ikki parallel syujet: birida u 960-golini uradi, boshqasida esa uning bronza timsoli yoqib yuborilmoqchi bo‘ladi.
Agar Ronaldu ketadigan bo‘lsa, bu “sokin xayrlashuv” bo‘lmaydi. Uning uslubiga ko‘proq stadionlar bo‘ylab tantanali tur, katta shov-shuvli media loyihalar va albatta minginchi gol sari navbatdagi yurish mos keladi. Chunki Ronaldu doim maydonga go‘yo tribunada muxlislar emas, hakamlar hay’ati o‘tirgandek chiqadi.
Eng keskin xulosa shuki: Ronaldu futbolni tugatishdan unchalik qo‘rqmaydi, u yangiliklar qahramoni bo‘lib qolmaslikdan xavotirda. Infopovod yaratish esa uning eng kuchli quroli: Pirs Morgan bilan intervyudan tortib, «Betmen» olamidagi taxminiy Joker roliga qadar.
Ronaldu “qolgan oz yillarimdan rohatlanmoqchiman” deya takrorlayapti, dunyo esa o‘sha “oz yil” aslida nechaga cho‘zilishini bahs qiladi. Portugaliyalik esa odatdagidek davom etadi: har bir qadamini voqeaga, har bir golini dalilga, har bir “tez orada”sini esa deyarli abadiylikka aylantirishda.
“Zamin”ni Telegramʻda oʻqing!
