Namangan viloyatida huquqni muhofaza qiluvchi organlar tomonidan oʻtkazilgan navbatdagi tezkor tadbirda yana bir jinoiy sxemaga chek qoʻyildi. Davlat xavfsizlik xizmati viloyat boshqarmasi xodimlari Bosh prokuratura huzuridagi Departament hamda Bojxona idoralari bilan hamkorlikda Chust tumani hududida maxsus operatsiya oʻtkazdi.
Olib borilgan tadbir davomida maʼlum boʻlishicha, Yangi Namangan tumanida yashovchi shaxs hamda Chust tumanida istiqomat qiluvchi, muqaddam sudlangan fuqaro oldindan kelishib olgan holda noqonuniy faoliyat bilan shugʻullangan. Ular xorijdan olib kelingan qalbaki valyuta — 10 ming AQSH dollarini haqiqiy pul sifatida muomalaga kiritishni rejalashtirgan.
Jinoiy rejaga koʻra, mazkur qalbaki dollarlar shartli xaridorga 7,5 ming AQSH dollari evaziga sotilishi kerak boʻlgan. Biroq kelishilgan paytda tezkor idoralar tomonidan ular ushbu noqonuniy bitimni amalga oshirayotgan vaqtda ashyoviy dalillar bilan qoʻlga olindi.
Maʼlumotlarga koʻra, ushbu holat yuzasidan tegishli tartibda jinoyat ishi qoʻzgʻatilgan. Ayni damda huquqni muhofaza qiluvchi organlar tomonidan surishtiruv va tergov harakatlari izchil olib borilmoqda.
Bu kabi holatlar yana bir bor shundan dalolat beradiki, noqonuniy valyuta aylanmasi va qalbaki pullar bilan bogʻliq jinoyatlarga qarshi kurash izchil davom etmoqda. Mutaxassislar esa fuqarolarni har qanday moliyaviy operatsiyalarda hushyor boʻlishga, shubhali takliflarga ishonmaslikka chaqiradi.
Qonun ustuvorligi taʼminlanayotgan bugungi kunda bunday jinoyatlarga qarshi qatʼiy choralar koʻrilishi tabiiy.
“Zamin”ni Telegramʻda oʻqing!
