Germaniya chempionatining 22-turida «Gamburg» o‘z maydonida «Union Berlin»ni qabul qildi va keskin kechgan uchrashuvda irodali g‘alabani qo‘lga kiritdi. Bu haqda euro-football.ru xabar beradi.
Mehmonlar 28-daqiqada Leopold Kverfeldning penaltidan yo‘llagan zarbasi orqali hisobni ochdi — 0:1. Biroq «Gamburg» tezda javob qaytardi: 35-daqiqada Ransford Kenigsdorffer Robert Glatselning uzatmasidan unumli foydalanib, muvozanatni tikladi. Birinchi bo‘lim yakunida esa Nikolas Kapaldo mezbonlarni oldinga olib chiqdi — 2:1.
Ikkinchi taymda «Union» standart vaziyatlar orqali xavfli hujumlar uyushtirdi: Derrik Kenning jarima zarbasi to‘sinni jaranglatdi. Shunga qaramay, 82-daqiqada Kenigsdorffer Gyorgi Gocholeshvilining pasidan so‘ng dubl qayd etib, «Gamburg»ning ustunligini mustahkamladi — 3:1.
Uchrashuv so‘ngida intriga yana qaytdi: 89-daqiqada Oliver Berk Andrey Ilichning qanotdan uzatmasini bosh bilan yakunlab, farqni qisqartirdi — 3:2. Yakunda «Gamburg» hisobni ushlab qoldi, tomonlar esa natijaga ko‘ra turnir jadvalida 9-o‘rinni bo‘lishib turibdi.
“Zamin”ni Telegramʻda oʻqing!
