Real Madrid va Barselona daromadi 1 mlrd dollardan oshdi
"Real Madrid" va "Barselona" 2024/25-yilgi mavsumda daromadi 1 milliard dollardan oshgan dunyodagi yagona futbol klublariga aylandi. Mazkur ko'rsatkich bo'yicha Ispaniya grandlari hatto boy hisoblangan Angliya klublarini ham ortda qoldirib, jahon miqyosida faqat AQSHning ayrim professional jamoalari bilan tenglashmoqda. Hozirda "Real Madrid" 7,7 milliard dollar qiymat bilan dunyoning eng qimmat klubi bo'lib turibdi, kuchli uchlikni esa "Barselona" va "Manchester Yunayted" yakunlagan. Kuchli o'ntalikning oltita pog'onasini Angliya jamoalari egallagan bo'lsa-da, moliyaviy yetakchilik hamon Ispaniya vakillari qo'lida qolmoqda.
Angliya Premyer-ligasi dunyodagi eng boy futbol ligasi hisoblansa-da, Ispaniyaning ikki giganti miqyos jihatidan barcha raqiblarini ortda qoldirmoqda. "Real Madrid" va "Barselona" 2024/25 yilgi mavsumda daromadi 1 milliard dollardan oshgan yagona futbol klublari sifatida qayd etildi. Madridliklar 1,3 milliard dollar, kataloniyaliklar esa 1,1 milliard dollar daromad ko'rishga muvaffaq bo'ldi.
Jahon sporti miqyosida bunday yuqori moliyaviy ko'rsatkichlarga faqatgina AQShning "Dallas Kovboyz" (1,25 mlrd dollar) va "Los-Anjeles Dojers" (1,1 mlrd dollar) jamoalari chiqa olgan. Futbol olamida esa Ispaniya grandlari moliyaviy barqarorlik bo'yicha mutlaq yetakchilikni saqlab turibdi.
2026 yilgi prognozlarga ko'ra, dunyoning eng qimmat futbol klublari reytingini 7,7 milliard dollar qiymat bilan "Real Madrid" boshqarib bormoqda. Ikkinchi o'rinni 6,65 milliard dollar bilan "Barselona" egallagan bo'lsa, kuchli uchlikni Angliyaning "Manchester Yunayted" klubi (6,47 mlrd dollar) yakunlab bergan.
Kuchli o'ntalikdan shuningdek "Bavariya" (5,78 mlrd), "Liverpul" (5,74 mlrd), "Man Siti" (5,7 mlrd), "Arsenal" (5,43 mlrd), "PSJ" (5 mlrd), "Chelsi" (4 mlrd) va "Tottenxem" (3,5 mlrd) klublari joy oldi. Ro'yxatning oltita pog'onasini Angliya klublari egallaganiga qaramay, eng yuqori moliyaviy qiymat hamon Ispaniya vakillari qo'lida qolmoqda.
Izohlar 0
…