Germaniya terma jamoasi bosh murabbiyi Julian Nagelsmann AQSh, Kanada va Meksikada bo‘lib o‘tadigan Jahon chempionati uchun tarkibni e’lon qilish arafasida. Kölner Stadt-Anzeiger va Bild nashrlari xabariga ko‘ra, 1. FC Köln hujumchisi Said El Mala terma jamoa tarkibiga kiritilgan. 19 yoshli futbolchi hali milliy terma jamoa safida birorta o‘yin o‘tkazmagan bo‘lsa-da, murabbiy uning iqtidoriga tayanmoqchi. Bu haqda Goal.com xabar beradi.
Mart oyidagi o‘rtoqlik o‘yinlari oldidan Nagelsmann El Malani tarkibga kiritmagani uchun keskin tanqid qilingan edi. O‘sha vaqtda murabbiy futbolchining klubdagi o‘yin amaliyoti kamligini va himoyadagi harakatlari talab darajasida emasligini ta’kidlagandi. Biroq, mavsumning ikkinchi yarmida vaziyat tubdan o‘zgardi.
Klubdagi murabbiy almashinuvidan so‘ng, Said El Mala asosiy tarkibning ajralmas qismiga aylandi. U Bundesligada 13 ta gol va 5 ta golli uzatma bilan mavsumni yakunladi. Shuningdek, Germaniya U21 terma jamoasi safida Yevropa chempionati saralashida ko‘rsatgan yorqin o‘yini murabbiylar shtabini uning nomzodini qayta ko‘rib chiqishga majbur qildi.
El Mala uchun bu chaqiruv faoliyatidagi eng katta yutuqlardan biri bo‘ladi. Yaqinda buvisini yo‘qotgan yosh hujumchi uchun terma jamoadagi debyut hissiyotlarga boy bo‘lishi kutilmoqda. Nagelsmann endilikda yosh iqtidor egasiga ishonch bildirib, uni Jahon chempionati uchun tayyorgarlik jarayoniga jalb etishga qaror qildi.
“Zamin”ni Telegramʻda oʻqing!
