Baseus kompaniyasi Xitoy bozorida PicoGo Super Energy Pro nomli yangi qurilmani namoyish etdi. Bu gadjet o‘zida mobil quvvatlagich (powerbank), tarmoq adapteri va kabelni birlashtirgan bo‘lib, sayohatchilar uchun juda qulay yechim hisoblanadi. Bu haqda Ixbt.com xabar beradi.
Qurilma 10 000 mA·soat sig‘imga ega akkumulyator, rozetkaga ulanadigan vilka va ikkita USB-C kabeli bilan jihozlangan. Kabelning biri 72 sm uzunlikdagi tortiladigan mexanizmga ega bo‘lsa, ikkinchisi 20 sm uzunlikda bo‘lib, qurilmani ko‘tarib yurish uchun tasma vazifasini ham bajaradi.
PicoGo USB-C porti orqali 67 W quvvat uzata oladi, bu esa smartfonlar, planshetlar va hatto ayrim noutbuklarni tezkor quvvatlash uchun yetarli. USB-A porti esa 20 W quvvatni taqdim etadi. Qurilma rozetkaga ulanganida «o‘tuvchi» quvvatlash funksiyasini qo‘llab-quvvatlaydi: avval ulangan gadjetlar, so‘ngra powerbankning o‘zi quvvatlanadi.
Qurilma korpusida ma’lumotlarni ko‘rsatuvchi displey va smartfon orqali holatni tekshirish uchun NFC moduli mavjud. PD, PPS va QC kabi tezkor quvvatlash standartlari qo‘llab-quvvatlanadi. 326 gramm og‘irlikdagi ushbu qurilma Xitoyda 345 yuan (taxminan 50 dollar) narxida sotuvga chiqarildi.
“Zamin”ni Telegramʻda oʻqing!
