Saudiya Arabistonida o‘tayotgan U-17 Osiyo kubogida yarimfinalning dastlabki uchrashuvi yakuniga yetdi. O‘zbekiston o‘smirlar terma jamoasi final yo‘llanmasi uchun Yaponiyaga qarshi maydonga tushdi va juda dramatik bahsda penaltilar seriyasida imkoniyatni boy berdi.
Uchrashuv vakillarimiz uchun yaxshi boshlandi. 28-daqiqada Asilbek Aliyev penaltidan unumli foydalanib, O‘zbekiston U-17 terma jamoasini hisobda oldinga olib chiqdi. Bu gol futbolchilarimizga qo‘shimcha ishonch berdi va birinchi bo‘limda jamoamiz raqibga munosib qarshilik ko‘rsatdi.
Ikkinchi bo‘limda Yaponiya bosimni kuchaytirishga harakat qildi. O‘zbekiston yoshlari esa himoyada tartibli o‘ynab, hisobni saqlab qolishga intildi. Ammo uchrashuvning eng og‘ir lahzasi qo‘shimcha daqiqalarda yuz berdi. 90+7-daqiqada Chimeziyekai gol urib, hisobni tenglashtirdi.
Asosiy vaqt 1:1 hisobida yakunlandi va finalchi penaltilar seriyasida aniqlandi. Afsuski, omad bu safar Yaponiya tomonida bo‘ldi. Penaltilar seriyasida yapon futbolchilari 3:2 hisobida ustun kelib, finalga yo‘l oldi.
Shu tariqa, O‘zbekiston U-17 terma jamoasi Osiyo kubogidagi ishtirokini yarimfinalda yakunladi. Garchi finalga chiqish nasib qilmagan bo‘lsa-da, yoshlarimiz butun musobaqa davomida xarakter, ishonch va kurashuvchanlik namoyish etdi.
Eng muhimi, O‘zbekiston U-17 jamoasi mazkur turnir orqali Jahon chempionati yo‘llanmasini qo‘lga kiritdi. Bu esa ushbu avlod uchun katta tajriba va kelajakdagi yanada yirik maqsadlar sari muhim qadam hisoblanadi.
Osiyo kubogi U-17. Yarimfinal
O‘zbekiston U-17 — Yaponiya U-17 1:1
Penaltilar seriyasi: 2:3
Gollar: Asilbek Aliyev, 28 penalti — Chimeziyekai, 90+7.
O‘zbekiston U-17: Olimjon Shomurodov, Muhammad Hakimov, Muhammad Mamatov, Amirxon Erkinov, Islom Ravshanov, Asilbek Aliyev, Abduraimov 70, Suxrob Sadirjonov, Orifxonov 65, Mirjamol Anvarov, Ahror Ravshanbekov, Adis Abdunabiyev, Abdisoliyev 65, Abubakir Rahimov.
Qisqasi, bu mag‘lubiyat alamli bo‘ldi, ayniqsa gol 90+7-daqiqada o‘tkazib yuborilgani yurakni “oy-voy” qildi. Ammo bu jamoa bosh egishi kerak emas. Yarimfinal, Jahon chempionati yo‘llanmasi va kuchli raqiblarga qarshi mardona o‘yin — bu avlodda katta kelajak borligini ko‘rsatdi.
“Zamin”ni Telegramʻda oʻqing!
