O'zbek olimining nanokarbon yutug'i: Topul

O'zbekistonlik olimlar bazalt va nanokarbonni birlashtirish ustida ishlamoqda. Bu texnologiya qurilish materiallarining mustahkamligi va uzoq muddatga chidamliligini oshirishga qaratilgan.

Professor Tolqin Pulatov tomonidan yaratilgan "Topul" nomli nanokarbon esa faqat qurilish sohasida emas, balki tibbiyot, farmatsevtika va suvni tozalash kabi boshqa ko'plab sohalarda ham qo'llanilishi mumkin. Olimning aytishicha, ushbu ko'p qatlamli nanokarbon biotexnologiyaga mos keladi va xavfsizdir.

U "Topul"ni sintez qilish orqali intellektual mulk agentligidan patentga ega bo'lgan. Tolqin Pulatov grafen — karbon atomlaridan tashkil topgan eng yupqa va mustahkam material ustida ishlagan.

U grafenning tuzilishini takomillashtirib, qalinligi va ichki tuzilishini boshqarish imkoniyatiga ega materialni yaratdi. Ushbu material elektr o'tkazuvchan yoki izolyator sifatida ishlatilishi mumkin.

Bundan tashqari, "Topul"ning suvni tozalashdagi samaradorligi o'ziga xos. U faqat og'ir metallarni ushlab qolmay, mikroorganizmlar va parazitlarni ham yo'q qiladi.

Shuningdek, "Topul" oziq-ovqat mahsulotlarining saqlash muddatini bir necha barobar uzaytirish imkonini beradi. Masalan, sut mahsulotlariga oz miqdorda "Topul" qo'shilsa, ularning saqlash muddati sezilarli darajada ortadi.

Bu oziq-ovqat sanoati va qishloq xo'jaligida katta yutuqlarga olib kelishi mumkin. Olimning tadqiqotlari shuni ko'rsatdiki, bazalt aralashmalariga atigi 1,5% "Topul" qo'shilishi bilan beton va bazalt materiallarining mustahkamligi uchdan bir qismga oshadi.

Natijada, bunday materiallardan qurilgan inshootlarning xizmat muddati odatiy 50 yildan 200 yilgacha uzayishi mumkin. Bu, ayniqsa, ko'priklar, yo'llar va sanoat ob'ektlari qurilishida katta ahamiyatga ega.

“Zamin”ni Telegramʻda oʻqing!