Elon Musk OpenAI tuzilmasi, rahbariyati va moliyasiga tahdid solgan sud jarayonida magʻlub boʻlganidan bir kun oʻtib, sunʼiy intellekt giganti oʻzining birlamchi ommaviy aksiyalar joylashtiruvi (IPO) jarayonini boshlashga tayyorligini maʼlum qildi. Wall Street Journal manbalariga koʻra, kompaniya yaqin oylarda fond bozoriga chiqishni rejalashtirmoqda. Bu haqda Techcrunch.com xabar beradi.
OpenAI bosh direktori Sam Altman kompaniya sentyabr oyigacha ommaviy savdolarga tayyor boʻlishiga umid qilmoqda. ChatGPT yaratuvchisi ushbu jarayonni amalga oshirish uchun texnologik IPO sohasida yetakchi hisoblangan Goldman Sachs va Morgan Stanley investitsiya banklari bilan hamkorlik qilmoqda. Maʼlumotlarga koʻra, IPO uchun maxfiy hujjatlar bir necha kun yoki hafta ichida tartibga soluvchi organlarga taqdim etilishi mumkin.
OpenAI kompaniyasining kutilayotgan yirik debyuti dunyo hamjamiyati SpaceX kompaniyasining IPO hujjatlari eʼlon qilinishini kutayotgan bir vaqtga toʻgʻri kelmoqda. Elon Muskning xAI loyihasini oʻz ichiga olgan SpaceX hozirda OpenAI kompaniyasining asosiy raqobatchilaridan biri hisoblanadi.
Musk oʻzi asos solgan OpenAI kompaniyasini sud orqali toʻxtatishga boʻlgan urinishi muvaffaqiyatsiz yakunlangach, Musk va Altman oʻrtasidagi navbatdagi kurash moliya olamida davom etishi kutilmoqda. Hozircha bozor ishtirokchilari qaysi kompaniyaning aksiyalari koʻproq talabga ega boʻlishini qiziqish bilan kuzatmoqdalar. OpenAI vakillari hozircha ushbu xabarlar yuzasidan rasmiy izoh berishmadi.
“Zamin”ni Telegramʻda oʻqing!
