“Liverpul”dagi to‘qqiz yillik sermahsul faoliyatidan keyin Muhammad Saloh jamoani tark etishga yaqin turibdi. Misrlik yulduzning keyingi manzili haqida turli taxminlar tarqalayotgan bir paytda, Madridning “Atletiko” klubi varianti ham kun tartibiga chiqdi.
WinWin ma’lumotiga ko‘ra, avvalroq 33 yoshli hujumchi uchun asosiy da’vogarlar Saudiya Arabistoni klublari sifatida ko‘rilayotgan edi. Biroq endilikda Salohni Yevropada qoldirishi mumkin bo‘lgan yangi yo‘nalish — “Atletiko” haqida ham xabarlar paydo bo‘ldi.
Muhammad Saloh “Liverpul” safida umumiy hisobda 441 ta o‘yin o‘tkazib, 257 ta gol va 122 ta golli uzatma qayd etdi. Bu raqamlar uning mersisaydliklar tarixidagi eng muhim futbolchilardan biriga aylanganini ko‘rsatadi.
Madrid klubiga yaqin manbaga ko‘ra, “Atletiko” Saloh darajasidagi futbolchiga qiziqishi tabiiy. Ammo bunday transferni amalga oshirish oson bo‘lmaydi.
“Saloh — eng yuqori darajadagi futbolchi va, albatta, istalgan Yevropa klubi uni o‘z tarkibiga qo‘shib olishni istaydi. Ammo hozircha hech qanday rasmiy qadamlar tashlanmadi. Asosiy muammo — uning yuqori maoshi, bu esa madridliklarning hozirgi moliyaviy tuzilmasiga mos kelmaydi”, — dedi manba.
Hozirda Saloh yiliga 20 million funtdan ortiq maosh oladi. Aynan shu moliyaviy talablar uning “Atletiko”ga o‘tishi yo‘lidagi asosiy to‘siq bo‘lishi mumkin. Madridliklar tajribali, tezkor va hal qiluvchi futbolchini qo‘lga kiritishni xohlashi mumkin, ammo iqtisodiy jihatdan bu transfer jiddiy hisob-kitob talab qiladi.
Qisqasi, Muhammad Salohning kelajagi hali ochiq turibdi. Saudiya varianti bor, Yevropada qolish ehtimoli ham yo‘q emas. “Atletiko” esa juda qiziq yo‘nalish: Simeone futboliga Salohning tezligi va tajribasi qo‘shilsa, bu Madridda katta syujet bo‘ladi. Ammo hozircha asosiy savol bitta — maosh masalasi qanday hal qilinadi?
“Zamin”ni Telegramʻda oʻqing!
