Elon Musk boshqaruvidagi SpaceX aerokosmik kompaniyasi IPO uchun topshirgan arizasida 18 712 dona Bitcoin aktiviga egaligini maʻlum qildi. Hozirgi bozor narxlarida ushbu aktivlar qiymati 1,45 milliard dollarni tashkil etadi. Bu koʻrsatkich blokcheyn tahlilchilari taxmin qilganidan qariyb 10 ming tangaga koʻproqdir. Bu haqda Cointelegraph.com xabar beradi.
Kompaniyaning 12-iyun kuni ochiq aksiyadorlik jamiyatiga aylanish maqsadida topshirgan S-1 roʻyxatga olish bayonotiga koʻra, SpaceX har bir Bitcoin tangasini oʻrtacha 35 320 dollardan sotib olgan. Ushbu hisobot SpaceX kompaniyasini dunyodagi eng yirik Bitcoin egalari boʻlgan ochiq kompaniyalar orasida yettinchi oʻringa olib chiqadi.
SpaceX kapital bozorlari tarixidagi eng yirik IPO oʻtkazishga tayyorgarlik koʻrmoqda. Kompaniya 1,75 trilliondan 2 trillion dollargacha boʻlgan baholash bilan qariyb 75 milliard dollar mablagʻ jalb qilishni koʻzlagan. Kompaniya aksiyalarini sotib olish investorlar uchun nafaqat aerokosmik va AI sohalariga, balki Bitcoin aktivlariga ham bilvosita investitsiya qilish imkonini beradi.
Hujjatlar shuni koʻrsatadiki, SpaceX hozirda 11 509 dona Bitcoinʻga ega boʻlgan Tesla kompaniyasidan koʻra koʻproq kriptovalyuta zaxirasiga ega. Avvalroq Arkham va BitcoinTreasuries.NET kabi tahliliy platformalar SpaceX balansida atigi 8 285 dona Bitcoin borligini taxmin qilgan edi.
SpaceX 2026-yilda birjaga chiqishni rejalashtirayotgan OpenAI va Anthropic kabi yirik xususiy kompaniyalardan biridir. IPO orqali jalb qilingan mablagʻlar Starlink, orbital maʻlumotlar markazlari va Marsni kolonizatsiya qilish kabi global loyihalarni moliyalashtirishga yoʻnaltiriladi. Kompaniya AI, kosmos va aloqa sohalarini qamrab oluvchi 28,5 trillion dollarlik ulkan bozorni nishonga olgan.
“Zamin”ni Telegramʻda oʻqing!
