Олий Мажлис Қонунчилик палатаси депутатлари Ўзбекистоннинг 2030-йилгача яшил иқтисодиётга ўтиш стратегиясини амалга ошириш жараёни ҳақида батафсил маълумот олиш учун вазирларга сўров юборди. Парламент мажлисида қайд этилишича, энергетика соҳасидаги ислоҳотлар туфайли иссиқхона газлари чиқиндилари 6,3 миллион тоннага камайган.
Ушбу қисқаришнинг бир қисми (тахминан 500 минг тонна) халқаро углерод бозорида сотилиб, мамлакатга 7,5 миллион доллар миқдорида грант маблағлари олиб келган. Шунингдек, 6,3 миллион кВт/соат электр энергияси, 82 минг куб метр сув ва 1050 тоннаддан ортиқ хомашё тежашга эришилган.
140 дан ортиқ йирик саноат ва цемент заводларида ҳаво ва газни тозалаш учун замонавий фильтрлаш тизимлари ўрнатилган. 2024-йилнинг баҳор ва куз фаслларида корхоналар ҳудудлари атрофида "яшил камар"лар ташкил этилиб, 11,8 миллион дарахт ва бута кўчатлари экилган.
Бундан ташқари, давлат ўрмон фондининг 7 минг гектар фойдаланилмаган ер майдонлари мамлакат ўрмонлилик даражасини ошириш учун ўзлаштирилган. Шу билан бирга, депутатлар атроф-муҳитни муҳофаза қилиш бўйича ҳали ҳам ечимини топмаган масалалар мавжудлигини таъкидлашди: ҳаво ифлосланиши, чиқиндиларни қайта ишлаш, экологик назорат ва энергия тежовчи технологияларни жорий этиш тизимли ёндашувни талаб қилади.
Аҳоли ушбу масалаларни депутатлар билан учрашувларда бир неча бор кўтарган. Эндиликда вазирлар корхоналарнинг ифлослантирувчи даражасини қандай баҳолаши, зарарли моддалар чиқиндиларини камайтириш, "яшил сертификат" экологик сертификатлашни жорий этиш, технологик жараёнларни белгилаш ҳамда кичик бизнесни экологик стандартларга ўтишда қандай қўллаб-қувватлаётгани борасида тушунтириш беришлари лозим.
