Ўзбекистон элчиси Алишер Қаюмов Австралия генерал-губернатори Саманта Мостинга ишонч ёрлиғини топширди. Бу ҳақда “Дунё” ахборот агентлиги хабар берди.
Учрашув давомида Мостин Ўзбекистонда амалга оширилаётган ислоҳотларни эътироф этди. Шунингдек, Тошкент ва Канберра ўртасидаги ҳамкорлик истиқболлари муҳокама қилинди.
Қаюмов ва Мостиннинг фикрига кўра, ҳар икки давлат пахта ва тоғ-кон саноатига таянади. Мостин Самарқандда муваффақиятли ўтказилган ЮНЕСКО конференциясини юқори баҳолаб, Ўзбекистон австралиялик сайёҳлар учун қизиқарли мамлакатга айланаётганини таъкидлади.
Тошкент ва Канберра ўртасида дипломатик алоқалар 1991-йил декабрь ойи охирида ўрнатилган бўлиб, ўшанда Ўзбекистон ва Австралия ташқи ишлар вазирлари мактублар алмашган эди. Эслатиб ўтамиз, Қаюмов жорий йил баҳоридан буён Сингапурда Ўзбекистон элчихонасига бошчилик қилмоқда.
У ушбу мамлакат президентига ишонч ёрлиғини апрель ойида топширган эди.
Меҳмон гуруҳидаги фойдаланувчилар ушбу мақолага изоҳ қолдира олмайди.
