UFC енгил вазн тоифасининг собиқ чемпиони Хабиб Нурмагомедов Хамзат Чимаевнинг Шон Стриклэндга қарши жанги ҳақида фикр билдирди. Унинг таъкидлашича, Чимаев бу баҳсга тактик жиҳатдан янада кенгроқ тайёргарлик кўриши ва турли сценарийларни олдиндан ҳисобга олиши керак эди.
Хабибнинг фикрича, профессионал ММА жангчиси октагонга чиқишдан аввал фақат битта режа билан чекланиб қолмаслиги лозим. Жанг бошқача кечиб қолса, рақиб кутилмаган услубда ҳаракат қилса ёки асосий режа иш бермаса, захира вариантлар ҳам тайёр бўлиши шарт.
“Хамзат барча сценарийларни кўриб чиқиши керак эди. Агар шундай бўлса-чи, бошқача кетса-чи, агар бу томондан кириб келсак-чи? Профессионал ММАчи ҳамма нарсани ҳисобга олиш зарур”, — деди Нурмагомедов.
Хабиб ўз фаолиятидаги жанг режаси ҳақида ҳам гапириб ўтди. Унинг айтишича, шахсан ўзи учун режа жуда оддий бўлган: рақибни партерга олиб ўтиш ва шу ерда устунликни қўлга киритиш. Агар биринчи уриниш самара бермаса, у яна ва яна қайта ҳаракат қилган бўларди.
“Шахсан мен учун жанг режасини тузиш қийин эмас эди. Менда доим битта вариант бўларди — рақибни партерга олиб ўтиш! Агар ўхшаса — яхши, ўхшамаса яна юз марта уринардим”, — деди собиқ чемпион.
Нурмагомедовнинг танқидига кўра, Чимаев айрим жангларида айнан шу қатъият ва режага содиқликни етарлича кўрсатмаган. У Гилберт Бёрнс ва Камару Усманга қарши баҳсларни мисол қилиб келтирди. Хабибнинг фикрича, Хамзат дастлабки раундларда курашини ўтказа олмаганидан кейин кейинги раундларда асосан тик ҳолатда жанг қилишга мажбур бўлган.
Бу эса Чимаевнинг энг кучли қуроли ҳисобланган кураш услубидан тўлиқ фойдаланилмаганини англатади. Хабиб айнан шу жиҳатга эътибор қаратмоқда: агар сенинг асосий устунлигинг бор бўлса, рақиб уни тўхтатган тақдирда ҳам ундан воз кечмаслик керак.
Собиқ чемпионнинг айтишича, у бу ҳақда Чимаевга бир йил аввал ҳам айтган. Аммо Шон Стриклэндга қарши жангда ҳам Хамзат худди шу тактик хатога йўл қўйган.
“Мен бир йил аввал унга бу ҳақда айтгандим. Бироқ Шонга қарши тўқнашувда ҳам Чимаев худди шу тактик хатога йўл қўйди”, — деди Нурмагомедов “HUSTLE SHOW” подкастида.
Хабибнинг бу фикрлари ММА мухлислари учун анча қизиқ. Чунки у ўз фаолияти давомида айнан тактик интизом, партердаги босим ва режага қатъий амал қилиш орқали мағлубиятсиз чемпионга айланган. Шу боис унинг Чимаев ҳақидаги танқиди оддий фикр эмас, катта тажрибага асосланган таҳлил сифатида қабул қилинади.
Қисқаси, Хабиб Чимаевнинг муаммосини очиқ айтди: кучли қурол бор, аммо ундан охиригача фойдаланиш керак. ММАда фақат характер эмас, режа ҳам жанг қилади. Хамзат эса кейинги баҳсларда шу сабоқдан тўғри хулоса чиқарса, янада хавфлироқ рақибга айланиши мумкин.
“Zamin”ни Telegram'да ўқинг!
