Қозоғистон пойтахти Астана шаҳрида Туркий давлатлар шахмат форуми доирасида “Turkic Team Chess Championships 2026” халқаро мусобақаси старт олди. 13–17 май кунлари ўтказиладиган ушбу нуфузли беллашувда эркаклар ва аёллар жамоалари ғолиблик учун дона суради.
Мусобақа туркий давлатлар шахматчилари учун муҳим майдон бўлиб, унда нафақат спорт натижалари, балки ҳамкорлик, тажриба алмашиш ва шахмат мактаблари ўртасидаги алоқаларни кучайтириш масалалари ҳам алоҳида аҳамият касб этади.
Турнирнинг умумий мукофот жамғармаси 42 минг АҚШ долларини ташкил этади. Эркаклар ва аёллар йўналишида ғолиб чиққан жамоаларнинг ҳар бири 21 минг АҚШ доллари миқдоридаги мукофотга эга бўлади. Бу эса мусобақа нуфузи ва рақобат даражаси анча юқори эканини кўрсатади.
Ўзбекистон эркаклар терма жамоаси таркибида тажрибали ва кучли шахматчилар жамланган. Жамоа сафида гроссмейстерлар Абдималик Абдисалимов, Жаҳонгир Воҳидов, Ортиқ Нигматов, шунингдек, халқаро спорт усталари Саидакбар Саидалиев ва Асроржон Омонов иштирок этмоқда.
Эркаклар терма жамоаси таркиби:
Абдималик Абдисалимов — гроссмейстер, 2530 рейтинг
Жаҳонгир Воҳидов — гроссмейстер, 2515 рейтинг
Ортиқ Нигматов — гроссмейстер, 2470 рейтинг
Саидакбар Саидалиев — халқаро спорт устаси, 2454 рейтинг
Асроржон Омонов — халқаро спорт устаси, 2345 рейтинг
Аёллар терма жамоаси ҳам кучли таркиб билан мусобақага киришмоқда. Ўзбекистон шарафини Афруза Ҳамдамова, Умида Омонова, Гулдона Каримова, Мадинабону Халилова ва Асал Салимова ҳимоя қилади. Бу таркибда ёшлик, тажриба ва катта мақсадлар уйғунлашган.
Аёллар терма жамоаси таркиби:
Афруза Ҳамдамова — аёллар халқаро гроссмейстери, 2423 рейтинг
Умида Омонова — аёллар халқаро гроссмейстери, 2357 рейтинг
Гулдона Каримова — аёллар халқаро спорт устаси, 2279 рейтинг
Мадинабону Халилова — аёллар ФИДЕ спорт усталигига номзод, 2226 рейтинг
Асал Салимова — аёллар ФИДЕ спорт устаси, 2144 рейтинг
Туркий давлатлар шахмат форуми доирасида 6 давлат федерациялари ўртасидаги алоқаларни янги босқичга олиб чиқиш, қўшма лойиҳаларни ривожлантириш ва шахмат соҳасида ўзаро тажриба алмашиш масалаларига ҳам катта эътибор қаратилмоқда.
Бу каби мусобақалар ёш шахматчилар учун ҳам катта руҳий туртки беради. Чунки халқаро жамоавий беллашувлар нафақат рейтинг ва мукофот, балки характер, жамоавийлик ва катта саҳнада ўзини кўрсатиш имкониятидир.
Қисқаси, Астанадаги турнир ўзбек шахмати учун яна бир муҳим синов майдони бўлади. Терма жамоаларимиз таркиби кучли, мақсад эса аниқ — туркий давлатлар орасида муносиб натижа кўрсатиш ва юртимиз шахмат мактабининг салоҳиятини яна бир бор намойиш этиш.
“Zamin”ни Telegram'да ўқинг!
