Россия Арманистонга пули тўланган қурол-яроғни юборгани йўқ, энди томонлар муаммога ечим топиш бўйича музокаралар олиб бормоқда, деди 24 ноябр, жума куни Арманистон бош вазири Никол Пашинян.
«Тўлов эвазига қурол-яроғ ва техника берилмаганига келсак, албатта, бундай муаммолар бор. Бу муаммоларни ҳал қилиш механизмлари бўйича маслаҳатлашувлар олиб борилмоқда», — дея Пашинян сўзларидан иқтибос келтиради ТАСС агентлиги. У «Россиянинг ўзи қуролга муҳтож», деди ҳамда нима учун таъминот йўқлигига аниқлик киритмади.
Бош вазирнинг сўзларига кўра, муаммони ҳал қилишнинг эҳтимолий вариантлари орасида Арманистоннинг Россия олдидаги қарзини тўлаган маблағ эвазига камайтириш ҳам бор. «Биз ишлашга тайёрмиз, музокаралар аниқ натижалар беради деб умид қиламиз», — деди Пашинян. Кремл Пашиняннинг баёнотига изоҳ бермади.
Арманистон ва КХШТ ўртасидаги инқироз
2023 йил сентябрида Тоғли Қорабоғда ҳарбий ҳаракатлар якунланганидан кейин Пашинян Коллектив хавфсизлик шартномаси ташкилоти (КХШТ)га ишора қилиб, Арманистон иштирок этаётган тузилмаларни самарасиз деб атади. Арманистоннинг КХШТга аъзо бўлиши 2020 йилдан бошлаб Ереванга ҳеч нарса олиб келмади, деди ёзда Арманистон Хавфсизлик кенгаши котиби Армен Григорян. «2020 йилдан буён Озарбойжон томонидан Арманистонга учта йирик ҳужум уюштирилди, бунда КХШТ Арманистонга ҳеч қандай ёрдам бермади», деди у.
2023 йил январида Арманистон ўз ҳудудида КХШТ ўқув машғулотларини ўтказишдан бош тортди, июлда эса ушбу ташкилот қутқарув хизматларининг Беларусдаги машғулотларида қатнашмасликка қарор қилди. 2023 йил май ойида Никол Пашинян Арманистон КХШТдан чиқиб кетиши мумкинлигини истисно этмади.
Ноябр ойида бош вазир Минскдаги КХШТ саммитига келмади ва ташкилотдан Ереванга ёрдам кўрсатиш ҳақидаги ҳужжатни йиғилиш кун тартибидан олиб ташлашни сўради.
“Замин” янгиликларини “Telegram”да кузатиб боринг
