Foto: Reuters
Rossiya Armanistonga puli to‘langan qurol-yarog‘ni yuborgani yo‘q, endi tomonlar muammoga yechim topish bo‘yicha muzokaralar olib bormoqda, dedi 24 noyabr, juma kuni Armaniston bosh vaziri Nikol Pashinyan.
«To‘lov evaziga qurol-yarog‘ va texnika berilmaganiga kelsak, albatta, bunday muammolar bor. Bu muammolarni hal qilish mexanizmlari bo‘yicha maslahatlashuvlar olib borilmoqda», — deya Pashinyan so‘zlaridan iqtibos keltiradi TASS agentligi. U «Rossiyaning o‘zi qurolga muhtoj», dedi hamda nima uchun ta’minot yo‘qligiga aniqlik kiritmadi.
Bosh vazirning so‘zlariga ko‘ra, muammoni hal qilishning ehtimoliy variantlari orasida Armanistonning Rossiya oldidagi qarzini to‘lagan mablag‘ evaziga kamaytirish ham bor. «Biz ishlashga tayyormiz, muzokaralar aniq natijalar beradi deb umid qilamiz», — dedi Pashinyan. Kreml Pashinyanning bayonotiga izoh bermadi.
Armaniston va KXSHT o‘rtasidagi inqiroz
2023 yil sentyabrida Tog‘li Qorabog‘da harbiy harakatlar yakunlanganidan keyin Pashinyan Kollektiv xavfsizlik shartnomasi tashkiloti (KXSHT)ga ishora qilib, Armaniston ishtirok etayotgan tuzilmalarni samarasiz deb atadi. Armanistonning KXSHTga a’zo bo‘lishi 2020 yildan boshlab Yerevanga hech narsa olib kelmadi, dedi yozda Armaniston Xavfsizlik kengashi kotibi Armen Grigoryan. «2020 yildan buyon Ozarboyjon tomonidan Armanistonga uchta yirik hujum uyushtirildi, bunda KXSHT Armanistonga hech qanday yordam bermadi», dedi u.
2023 yil yanvarida Armaniston o‘z hududida KXSHT o‘quv mashg‘ulotlarini o‘tkazishdan bosh tortdi, iyulda esa ushbu tashkilot qutqaruv xizmatlarining Belarusdagi mashg‘ulotlarida qatnashmaslikka qaror qildi. 2023 yil may oyida Nikol Pashinyan Armaniston KXSHTdan chiqib ketishi mumkinligini istisno etmadi.
Noyabr oyida bosh vazir Minskdagi KXSHT sammitiga kelmadi va tashkilotdan Yerevanga yordam ko‘rsatish haqidagi hujjatni yig‘ilish kun tartibidan olib tashlashni so‘radi.
“Zamin” yangiliklarini “Telegram”da kuzatib boring
