АҚШ президенти Дональд Трамп Украинага узоқ масофага мўлжалланган Tomahawk қанотли ракеталарини етказиб бериш эҳтимолини қатъиян рад этди. Бу ҳақда Оқ уй раҳбари 2 ноябр куни Air Force One президент самолётида журналистлар билан мулоқотда маълум қилди.
Трамп ушбу қурол тури Киевга етказиб берилиши эҳтимоли ҳақида савол берилганида, кескин тарзда: “Йўқ, аслида йўқ”, дея жавоб берди. Давлат раҳбарининг бу позицияси октябр ойининг бошларида кучайган баҳс-мунозараларга нуқта қўйди.
Ўша вақтда CNN телеканали маълумотига кўра, Пентагон ушбу ракеталарни етказиб беришга дастлабки розилик берган эди. Америка ҳарбий заҳираларида етарли миқдорда бундай қурол мавжудлиги ҳақида хулоса чиқарилган эди.
Аммо масаланинг ҳал қилувчи ва якуний қарори президентга боғлиқ бўлиб қолди. Трампнинг ҳозирги баёноти унинг аввалги фикрлари билан ҳамоҳанг.
Олдинги изоҳларида у мазкур ракеталар АҚШ мудофаа қудрати учун стратегик аҳамиятга эга эканини таъкидлаган эди. Президент бу қуролларни хорижга юбормасликни афзал кўришини, чунки улар АҚШ хавфсизлигини таъминлаш учун зарур эканлигини қайд этган.
Шундай қилиб, Мудофаа вазирлиги ҳарбий экспертларининг дастлабки хулосаларига қарамай, мамлакатнинг сиёсий раҳбарияти миллий хавфсизлик устуворликларидан келиб чиқиб қарор қабул қилди. Tomahawk ракетаcи номи Шимолий Американинг туб аҳолиси томонидан ишлатилган жанговор болта номидан келиб чиққан.
Ракетанинг илк модификацияларини бошқариш тизими ўз замони учун ноёб технология – TERCOM (Terrain Contour Matching)дан фойдаланган. Ушбу технология ракетага минимал баландликда учиб, ер рельефини сканерлаш ва ўз хотирасидаги рақамли харита билан солиштириш имконини берган.
Бу эса ракетани ҳаво ҳужумидан мудофаа тизимлари учун нишонга олишни жуда мураккаблаштирган.
