Google ва ўйин ишлаб чиқарувчи Epic Games Android платформасидаги ишлаб чиқарувчилар учун комиссия масаласида келишувга эришди. Ушбу қарор суд томонидан тасдиқланиши керак.
Google стандарт комиссияни транзакция турига қараб 20% ёки 9% гача камайтиришга тайёр. Бироқ, янгиланган йиғимлар компаниянинг ички тўлов тизимидан фойдаланиш учун қўшимча 5% комиссияни ўз ичига олмайди.
"Агар бу тасдиқланса, суд жараёнларимизга якун ясайди", — дейди Google Android президенти Самир Самат. Технология гиганти, шунингдек, Android тизимида ишлайдиган смартфонларга учинчи томон дўконларини ўрнатишни осонлаштиради.
Ушбу ташаббуслар нафақат АҚШда, балки бошқа мамлакатларда ҳам қўлланилади. Шу билан бирга, Epic Games Google компаниясининг ўз тўлов тизимидан фойдаланишни талаб қилишига қарши эмас, бироқ иловаларда бошқа тўлов усуллари ҳам бўлиши ва улар орқали арзонроқ нархлар ўрнатиш имконияти яратилиши лозимлигини таъкидламоқда.
Эслатиб ўтамиз, Epic Games 2020-йилда Google’га қарши даъво аризаси берган эди. Ўйин ишлаб чиқарувчи компания Google’ни Android платформасида рақобатга зид монополияда айблаган ва комиссия сиёсатига қарши норозилик билдирган.
