Меҳмонхона бизнесидаги йирик халқаро тармоқлардан бири бўлган Accor ўзининг Accor Live Limitless (ALL) садоқат дастури қоидаларига муҳим ўзгартиш киритди. Энди Марказий Осиё ва Кавказ минтақаларида дастурнинг энг юқори — Platinum ва Diamond мақомидаги аъзолар ҳам бепул нонушта имтиёзидан фойдалана олмайди.
Бу ҳақда “Ночной портье” Telegram-канали хабар тарқатди. Маълум қилинишича, ALL дастурининг янгиланган шартларига мувофиқ, бепул нонушта сиёсати Осиё–Тинч океани минтақасидаги қатор мамлакатларда қайта кўриб чиқилган. Шу билан бирга, бу қарор сайёҳлар ва доимий меҳмонлар орасида муайян саволлар ва муҳокамаларга сабаб бўлмоқда.
Ўзбекистон ҳудудида Accor тармоғига қарашли меҳмонхоналар ҳам ушбу ўзгариш доирасига кирди. Хусусан, Swissôtel Tashkent, Mercure Tashkent South, Mövenpick Samarkand ва Mercure Bukhara Old Town меҳмонхоналарида ALL’нинг юқори мақом эгалари эндиликда нонушта учун алоҳида тўлов қилишларига тўғри келади.
Қозоғистонда ҳам шунга ўхшаш вазият кузатилмоқда. У ердаги Rixos President Astana, Swissôtel Wellness Resort Alatau Almaty, Mercure Almaty City Center, Novotel Almaty, ibis Astana ва ibis Aktobe каби меҳмонхоналар ҳам янги қоидаларга амал қилади.
Хулоса қилиб айтганда, Accor’нинг бу қарори доимий саёҳат қиладиган мухлислар учун кутилмаган сюрприз бўлди. Энди эса сайёҳлар нафақат хонани, балки нонушта шартларини ҳам олдиндан яхшилаб ҳисоб-китоб қилишларига тўғри келади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
