Равшан Ҳайдаров бошчилигидаги Ўзбекистон U-21 терма жамоаси 2026 йил январь ойида бўлиб ўтадиган U-23 Осиё кубогига қизғин тайёргарлик жараёнини олиб бормоқда. Қитъа мусобақаси олдидан жамоа бош мураббийи матбуот анжуманида иштирок этиб, тайёргарлик режалари, таркиб сиёсати ва олдинга қўйилган вазифалар ҳақида батафсил тўхталиб ўтди. Бу ҳақда Ўзбекистон футбол ассоциацияси матбуот хизмати маълум қилди.
Мутахассис таъкидлаганидек, тайёргарлик жараёни 7 декабрдан бошлаб Тошкент шаҳрида старт олган. Ушбу йиғинларга жами 28 нафар футболчи жалб этилган бўлиб, машғулотлар давомида ҳар бир ўйинчининг жисмоний ва тактик ҳолати алоҳида ўрганилган. Равшан Ҳайдаровнинг сўзларига кўра, футболчилар турли мусобақа мавсумларини ўтказган, айримлари йиғинларга кечроқ қўшилган. Шунга қарамасдан, мураббийлар штаби барчани синовдан ўтказиб, умумий ҳолатни баҳолашга ҳаракат қилган.
Йиғиннинг кейинги босқичи Қатарда давом эттирилиши режалаштирилган. У ерда Ўзбекистон U-21 терма жамоаси Иордания ва Қатар U-23 жамоаларига қарши сўнгги назорат учрашувларини ўтказади. Ана шу баҳслардан кейин жамоа тўғридан-тўғри Осиё кубоги ўйинларига йўл олади.
Таркиб масаласига тўхталган Равшан Ҳайдаров мусобақада асосан 2005, 2006 йилларда туғилган ва ундан кичик — Олимпия ёшидаги футболчиларга таяниш режалаштирилганини қайд этди. Унинг айтишича, бу қарор мураббийлар кенгаши билан муҳокама қилинган ҳамда аввалги мусобақалар тажрибасига таянилган. Илгари ҳам Ўзбекистон ёшлар жамоалари шу тизим асосида иштирок этиб, яхши натижаларга эришган.
2003–2004 йилларда туғилган футболчилар эса айни пайтда клуб жамоаларида ўз ўрнини топган, Осиё кубогида чемпионликни қўлга киритган ва Жаҳон чемпионатида иштирок этган. Шунингдек, улар миллий терма жамоа сафига ҳам мунтазам жалб этиб келинмоқда. Шу боис, U-23 Осиё кубогига ёшроқ, истиқболли футболчилардан иборат таркиб билан бориш мақсад қилинган.
Олдинда турган вазифалар ҳақида гапирган Равшан Ҳайдаров жамоа ҳар доим олдига юқори мақсад қўйишини таъкидлади. Чунки Ўзбекистон ушбу мусобақада юқори рейтингга эга: терма жамоа аввал чемпион бўлган, сўнгги икки турнирда эса финалгача етиб борган. Шу сабабли, бу гал ҳам жамоа катта мақсадлар билан Осиё кубогига йўл олмоқда.
Мутахассиснинг фикрича, бу авлод учун ҳам ушбу мусобақа катта тажриба ва келажакдаги ютуқлар учун муҳим пойдевор бўлиб хизмат қилади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
