АҚШнинг US ITER лойиҳаси Франциянинг Кадарач шаҳрида қурилаётган халқаро термоядро реактори учун марказий соленоид қисмларини етказиб беришни якунлади. Сўнгги жўнатма электр уланишлари учун шиналар ва ток ўтказгичларни ўз ичига олди. Бу ҳақда Ixbt.com хабар беради.
Марказий соленоид баландлиги 18 метр ва кенглиги 4,25 метр бўлган улкан магнит тизими бўлиб, олтита алоҳида модулдан иборат. Ҳар бир модулнинг оғирлиги 122,5 тоннадан ошади ва тахминан 6 километр ўта ўтказувчан кабелдан ўралган.
Ушбу магнит тизимининг умумий оғирлиги қарийб 3000 тоннани ташкил этади.
Марказий соленоидни ишлаб чиқариш Калифорниядаги Генерал Атомиcс заводида 15 йил давом этди. Ҳозирги вақтда ITER объектида бешта модул йиғилган бўлиб, сўнгги модул кейинроқ қўшилади.
Йиғиш ишлари якунлангач, конструкция реактор ишлаши давомида улкан кучларга бардош бериши учун махсус рамка билан қисилади.
ITER экспериментал қурилма бўлиб, унинг асосий вазифаси электр энергияси ишлаб чиқариш эмас, балки бошқариладиган термоядро синтези имкониятини исботлашдир. US ITER вакилларининг таъкидлашича, ушбу лойиҳанинг якунланиши бутун жаҳон термоядро энергетикаси дастури учун муҳим қадам ҳисобланади.
Read “Zamin” on Telegram!
